პარლამენტის თავმჯდომარის დავით ბაქრაძის შეფასებით, NDI-ის კვლევებში გამოხატული მხარდაჭერა მმართეველი გინდისადმი, პირველ რიგში პასუხისმგებლობას გულისხმობს.
როგორც ბაქრაძემ ჟურნალისტებთან განაცხადა, კვლევებში მკაფიოდ გამოხატული მხარდაჭერა გულისხმობს, რომ უფრო მეტი უნდა ვიმუშაოთ და უფრო მეტი გავაკეთოთ პრობლემების მოსაგვარებლად.
„მოსახლეობის ნდობა და მხარდაჭერა ჩვენთვის პირველ რიგში ნიშნავს იმას, რომ ყველა მიმართულებით უფრო აქტიურები ვიყოთ და ბოლომდე მივიყვანოთ დაწყებული რეფორმა და პროცესი. ყველაფერი უნდა გავაკეთოთ, რომ მოსახლეობას ბევრად ნაკლები პრობლემა აწუხებდეს, ვიდრე ეს დღეს აქვს" - განაცხადა ბაქრაძემ.
NDI-ის კვლევის თანახმად, კითხვაზე, ხვალ რომ საპარლამენტო არჩევნები იყოს, რომელ პარტიას მისცემთ ხმას, გამოკითხულთა 47% "ერთიან ნაციონალურ მოძრაობას" ასახელებს. მეორე არჩევანის შემთხვევაში მმართველ გუნდს 2% ასახელებს.
რესპონდენტთა 10%-იანი მხარდაჭერით მეორე ადგილზეა კოალიცია "ქართული ოცნება". მეორე არჩევანის შემთხვევაში მას 3%-იანი მხარდაჭერა აქვს.
მესამე ადგილს გამოკითხულთა 3%-ის მხარდაჭერით "ქრისტიან-დემოკრატიული მოძრაობა" იკავებს. მეორე არჩევანის შემთხვევაში მას ხმას რესპონდენტთა 8% მისცემდა.
