პარლამენტის იურიდიულ საკითხთა კომიტეტის თავმჯდომარე პავლე კუბლაშვილი არ გამორიცხავს, რომ ბიძინა ივანიშვილისთვის საქართველოს მოქალაქეობის არმინიჭებისთვის რაიმე სამართლებრივი საფუძველი არსებობდეს.
როგორც მან კოალიცია "ქართული ოცნების" ლიდერისთვის მოქალაქეობის აღდგენის შესაძლებლობასთან დაკავშირებით განაცხადა, პრეზიდენტს მისთვის მოქალაქეობის არმინიჭებისთვის, შესაძლოა, რაიმე სამართლებრივი საფუძველი ჰქონდეს.
"ივანიშვილი საქართველოს მოქალაქე არ არის და, შესაბამისად, მისთვის ჩვენი ქვეყნის მოქალაქეობაზე უარის თქმის რაიმე საფუძველი თავისუფლად შეიძლება არსებობდეს. ეს სამართლებრივი საკითხია და მისი გადაწყვეტა მხოლოდ სამართლებრივ ჭრილში უნდა მოხდეს", - განაცხადა დეპუტატმა და ხაზი გაუსვა, რომ ივანიშვილმა საქართველოს მოქალაქეობაზე უარი ორჯერ თავადვე თქვა.
კოალიცია "ქართული ოცნების" პრესსპიკერმა მაია ფანჯიკიძემ დღეს გამართულ ტრადიციულ ბრიფინგზე იმედი გამოთქვა, რომ 5 აპრილს ხელისუფლება ივანიშვილისთვის საქართველოს მოქალაქეობის არმინიჭებას ვერ გაბედავს.