საგარეო საქმეთა სამინისტროში გაიმართა საქართველოსა და კოლუმბიას შორის პოლიტიკური კონსულტაციები საგარეო უწყების დეპარტამენტის დირექტორების დონეზე. კოლუმბიურ მხარეს წარმოადგენდა კოლუმბიის საგარეო საქმეთა სამინისტროს ევროპული დეპარტამენტის დირექტორი ალფონოს სორია მენდოზა. ქართული მხარე წარმოდგენილი იყო ამერიკის, საერთაშორისო ორგანიზაციების, საერთაშორისო სამართლებრივი და საერთაშორისო ეკონომიკურ, კულტურულ და ჰუმანიტარულ ურთიერთობათა დეპარტამენტების წარმომადგენლებით.
შეხვედრისას განხილულ იქნა საქართველოსა და კოლუმბიას შორის პოლიტიკური, ეკონომიკური და კულტურული ურთიერთობების გაღრმავების შესაძლებლობები, სამართლებრივი ბაზის განმტკიცება და თანამშრომლობა საერთაშორისო ორგანიზაციების ფარგლებში. გამოითქვა მზადყოფნა, ორ ქვეყანას შორის სხვადასხვა დონის ვიზიტების გაცვლასთან დაკავშირებით.
კოლუმბიურმა მხარემ გამოთქვა მადლიერება საქართველოს პრეზიდენტის 2011 წლის 26 ოქტომბრის ბრძანებულებასთან დაკავშირებით, რომლის თანახმად, კოლუმბიის მოქალაქეებს საქართველოში შემოსასვლელად და 360 დღემდე ყოფნისთვის ვიზა არ ესაჭიროებათ. კოლუმბიის საგარეო უწყების წარმომადგენელმა აღნიშნა, რომ კოლუმბიის მხარე მზადაა, ნაცვალგების პრინციპის თანახმად, გაამარტივოს სავიზო რეჟიმი საქართველოს მოქალაქეებისთვის.
