კოალიცია "ქართული ოცნება" საკანონმდებლო ცვლილებების პაკეტს მიუღებლად და მომავალი თაობის უფლებების შელახვად მიიჩნევს.
"ქართული ოცნება" სრულიად მიუღებლად და მომავალი თაობების უფლებების შელახვად მიიჩნევს საკანონმდებლო ცვლილებების პაკეტს, რომელიც საქართველოს ენერგეტიკისა და ბუნებრივი რესურსების სამინისტრომ მოამზადა, ხოლო საქართველოს პარლამენტმა 2012 წლის 20 მარტს დაჩქარებული წესით დაამტკიცა", _ ნათქვამია "ქართული ოცნების" მიერ გავრცელებულ განცხადებაში.
"საკანონმდებლო ცვლილებების მიხედვით, პრემიერ-მინისტრის გადაწყვეტილების საფუძველზე, შესაძლებელია შეთანხმების დადება დაინტერესებულ პირსა და საქართველოს ენერგეტიკისა და ბუნებრივი რესურსების სამინისტროს შორის, რის შემდეგაც დაინტერესებული პირის მიერ განხორციელებული ყველა მოქმედება ჩაითვლება კანონიერად სახელმწიფოსათვის გადახდილი გარკვეული კომპენსაციის სანაცვლოდ", _ ნათქვამია განცხადებაში.
საზოგადოებრივ მოძრაობაში მიიჩნევენ, რომ ამგვარი შეთანხმების საფუძველზე პირს აღარ დაეკისრება არანაირი სახის სამოქალაქო და ადმინისტრაციული პასუხისმგებლობა.
"ამგვარი შეთანხმების საფუძველზე პირს აღარ დაეკისრება არანაირი სახის სამოქალაქო და ადმინისტრაციული პასუხისმგებლობა, რაც დაკავშირებულია მის არამართლზომიერ, კანონსაწინააღმდეგო საქმიანობასთან და ყველა მის მიერ ჩადენილი ქმედება ჩაითვლება კანონიერად. მას შეეძლება მაგალითად, მიწის ნაყოფიერი ფენის მოხსნა, მიწის გაუვარგისება საწარმოო და სხვა ნარჩენებით, წყალსარგებლობის წესების დარღვევა, სასმელი წყლისა და ზღვის დაბინძურება, მათ შორის შხამქიმიკატებითა და ნავთობით, ტყით სარგებლობის წესებისა და მოთხოვნების დარღვევა, მერქნიან მცენარეთა უკანონო გაჩეხვა და დაზიანება, ტყეებში სახანძრო უსაფრთხოების ან ტყის ხანძრისაგან დაცვის მოთხოვნათა დარღვევა, ატმოსფერულ ჰაერში მავნე ნივთიერებათა გაფრქვევა ნორმების გადამეტებით, ქიმიურ საშუალებათა გარემოში გამოყენების ნორმების დარღვევა და მათი ტრანსპორტირების, შენახვისა და გამოყენების წესების დარღვევა, ტყვიაშემცველი ბენზინის იმპორტი და რეალიზაცია", _ აღნიშნულია განცხადებაში.
"ქართული ოცნების" წარმომადგენლები დაუშვებლად მიიჩნევენ მაკონტროლებელი ორგანოს მიერ ფიზიკური და იურიდიული პირების შემოწმებას.
"ცვლილებების მიხედვით, ასევე დაუშვებელია ხელშეკრულების მონაწილე ფიზიკური ან იურიდიული პირის შემოწმება მაკონტროლებელი ორგანოების მხრიდან და რაიმე სახის ჯარიმისა თუ სხვა სახის პასუხისმგებლობის დაკისრება",_ ნათქვამია განცხადებაში.
მათი თქმით, საკანონმდებლო ცვლილებების პაკეტი ელიტური კორუფციისთვის საფუძვლიან ნიადაგს შექმნის.
"მიგვაჩნია, რომ ცვლილებების პაკეტი ქმნის ნოყიერ ნიადაგს ელიტური კორუფციისთვის და ვიზიარებთ გარემოსდაცვითი არასამთავრობო ორგანიზაციების მოსაზრებას, იმასთან დაკავშირებით, რომ "აღნიშნული ცვლილებები ეწინააღმდეგობა საქართველოს მოქალაქეების კონსტიტუციურ უფლებას, ცხოვრობდეს ჯანმრთელობისთვის უვნებელ გარემოში და პრინციპს - კანონის წინაშე თანასწორობის შესახებ. ცვლილებები, ასევე, ეწინააღმდეგება საერთაშორისო ხელშეკრულებებს", _ ნათქვამია ქართული ოცნების მიერ გავრცელებულ განცხადებაში.
