ჟენევის საერთაშორისო მოლაპარაკებათა მორიგი რაუნდი ჟენევაში 29 მარტს გაიმართება. მოლაპარაკებებზე რუსულ დელეგაციას რუსეთის საგარეო საქმეთა მინისტრის მოადგილე გრიგორი კარასინი უხელმძღვანელებს.

გავრცელებულ განცხადებაში ნათქვამია, რომ რუსული დელეგაცია კვლავინდებურად აფხაზეთისა და ე.წ. სამხრეთ ოსეთისათვის საქართველოს მხრიდან უსაფრთხოების გარანტიებს მოითხოვს და ძალის გამოუყენებლობის შესახებ შეთანხმების გაფორმების საკითხს დააყენებს.

"სამუშაო ჯგუფის ყურადღება კონცენტრირებული იქნება ჟენევის მოლაპარაკებათა პროცესის მთავარ საკითხზე - აფხაზეთისა და სამხრეთ ოსეთის უსაფრთხოების უზრუნველყოფაზე დიმიტრი მედვედევისა და ნიკოლა სარკოზის მიერ 2008 წელს ხელმოწერილი შეთანხმების მიხედვით.

განხილული იქნება სხვა და სხვა ვარიანტები აფხაზეთის, საქართველოსა და სამხრეთ ოსეთის პრეზიდენტების მიერ ძალის გამოუყენებლობის შესახებ ცალმხრივად გაკეთებული განცხადებებისა, ასევე საერთაშორისო გარანტიების შესაძლებლობისა ძალის გამოუყენებლობის შეთანხმების კონტექტსტში", _ ნათქვამია განცხადებაში.
ამას გარდა, რუსეთის საგარეო საქმეთა სამინისტროში ასევე აცხადებენ, რომ მოლაპარაკებებზე ასევე განხილული იქნება სიტუაცია რომელიც აფხაზეთისა და ე.წ. სამხრეთ ოსეთის საზღვრებზეა შექმნილი.

რუსი დიპლომატების აზრით, აუცილებელია "ჯეროვანი შეფასება მიეცეს ქართული სპეცსამსახურების თანამშრომელთა გადასვლის გახშირებულ შემთხვევებს აფხაზეთის საზღვარზე და მათ პროვოკაციულ საქმიანობას გალის რაიონში".