პოლიტიკური პარტია "განახლებული საქართველოსთვის" თავმჯდომარე ნანა გულუა და ლიდერები მცხეთა-მთიანეთის რეგიონში რაიონული ორგანიზაციების ხელმძღვანელებს შეხვდნენ .
პარტიის წევრებმა შეხვედრაზე ტერიტორიულ-ზონალური დაყოფის აუცილებლობასა და ორგანიზაციების მუშაობის კონტროლის მექანიზმის სრულყოფაზე ისაუბრეს. პარტიაში აცხადებენ, რომ მცხეთა-მთიანეთის რეგიონში მიღებული შედეგების მიხედვით ისინი პარტიაში გაწევრიანების მსურველთა კიდევ უფრო მაღალ აქტივობას ელიან. მათივე თქმით, მხოლოდ მცხეთის რაიონში პარტიას უკვე 900-ზე მეტი მხარდამჭერი ჰყავს. მცხეთა-მთიანეთის რეგიონში სულ 90 000 ამომრჩეველი, მათ შორის 6 000 დევნილია.
რეგიონის კოორდინატორმა ზაალ თვალიაშვილმა შეხვედრაზე რეგიონის სტრუქტურული ერთეულების დაარსებისა და გაწეული მუშაობის შესახებ ისაუბრა. პარტიის რაიონული ორგანიზაციების მიერ ამომრჩევლებთან გაწეული მუშაობის შესახებ მოხსენება გააკეთეს რაიონული ორგანიზაციების ხელმძღვანელებმა, დუშეთის რაიონის შესახებ ვანო თეთრუაშვილმა, ყაზბეგის - ნოდარ ჩოფიკაშვილმა, თიანეთის - ვაჟა ქისტაურმა და ახალგორის რაიონული ორგანიზაციის თავმჯდომარე ნაილი ნათაძემ.
"განახლებული საქართველოსთვის" თავმჯდომარე ნანა გულუმ შეხვედრის მონაწილეებს დეტალურად განუმარტა პარტიის შექმნის ძირითადი მოტივაცია და სტრატეგიული მიმართულებები. აღინიშნა, რომ პარტიის უმთავრეს პრიორიტეტებს ამომჩეველთან მიმართებაში დასაქმება, სოციალური პრობლემების გადაწყვეტა და ტერიტორიული მთლიანობის აღდგენა წარმოადგენს.
"თუ გვინდა, რომ ძლიერი ქვეყანა ავაშენოთ და ძალაუფლება დავუბრუნოთ ხალხს, ამისთვის ფეხზე უნდა დავაყენოთ ქართული სოფელი. ქართველი გლეხის გაძლიერება ჩვენი უმთავრესი პრიორიტეტია, რადგან მხოლოდ ტურიზმით ქვეყანას ვერ გადავარჩენთ და ეს უკვე პრაქტიკამაც აჩვენა. გადამამუშავებელი ქარხნებისა და მცირე საწარმოების მშენებლობით ჩვენ უნდა შევქმნათ პრეცედენტი ქართული ბაზრის გაძლიერების და, ამავე დროს, აღვადგინოთ ურთიერთობები მეზობელ ქვეყანასთან, რაც თითოეული ჩვენგანის სურვილია",-აღნიშნა გულუამ.
შეხვედრას მცხეთა-მთიანეთის რეგიონში ჩასახლებული აფხაზეთიდან დევნილი მოსახლეობაც ესწრებოდა, რომლებმაც დევნილების პრობლემების შესახებ ისაუბრეს. პარტიის მხარდამჭრებმა, აფხაზეთიდან დევნილმა ქალბატონებმა ფატი სიდიანმა და ეკა ჩოფლიანმა ისაუბრეს რეგიონში ჩასახლებული დევნილების პრობლემებზე და აღნიშნეს, რომ სამწუხაროდ, წლების განმავლობაში მათ დაკარგული ჰქონდათ თავიანთ კუთხეში დაბრუნების იმედი, მაგრამ პარტია "განახლებული საქართველოსთვის" გამოჩენის შემდეგ მათ ეს იმედი დაუბრუნდათ.
