ყველას სურს უკეთესი ურთიერთობა რუსეთთან, მაგრამ არა ჩვენი სუვერენიტეტის ხარჯზე, არა ჩვენი სახელმწიფოებრიობის ხარჯზე და არა ნატოსა და ევროკავშირის ხარჯზე, - ამის შესახებ ამის შესახებ საქართველოს პრეზიდენტმა მიხეილ საკაშვილმა გორში დავით აღმაშენებლის სახელობის თავდაცვის ეროვნულ აკადემიაში სიტყვით გამოსვლისას განაცხადა.
მისი თქმით, სხვათა შორის, ნატო და ევროკავშირი ჩვენი სახელმწიფოებრიობის მდგრადობის ერთადერთი გზაა მომავალი თაობებისთვის, რისთვისაც ამ სტრუქტურებში ინტეგრაციისთვის ნაკისრი ვალდებულებები განუხრელად უნდა შევასრულოთ.
"ნებისმიერი მუქარის, ზიანის მოყენების მცდელობის მიუხედავად, სიმტკიცე უნდა შევინარჩუნოთ ისე, როგორც ეს ბალტიისპირეთის ქვეყნებმა გააკეთეს.ამ სამ ერს, რომელიც ოდესღაც ოკუპირებული იყო და ახლა თავისუფალი და უსაფრთხოა არასდროს შეუტანია ეჭვი საკუთარ პრიორიტეტებში. ერთხელაც არ უყოყმანია და ბალტიისპირა სამივე სახელმწიფო დღეს ნატოსა და ევროკავშირის წევრია. ახლა ამ ქვეყნებში შეჭრა მოსკოვის ყველაზე რევანშისტულ ლიდერებსაც კი არ მოუვათ აზრად. 90-იან წლებში ბალტიელების აბსოლუტური სიმტკიცისა და შეუპოვრობის შედეგად, მათი შვილები, შვილიშვილები და ალბათ შვილთაშვილებიც უზრუნველ ქვეყნებში იცხოვრებენ", - განაცხადა პრეზიდენტმა და აღნიშნა, რომ იმ ერებმა, რომლებიც ახლოს იყვნენ ევროპულ ოჯახში შესვლასთან და მერყეობა გამოავლინეს, დააყოვნეს და თვალი მოსკოვისკენ მიაბრუნეს. მათ არა მხოლოდ წლები დაკარგეს, არამედ უფრო მეტი.
"მიიღეს მათ ამის სანაცვლოდ კარგი ურთიერთობა რუსეთთან? რა თქმა უნდა, არა - რუსეთის ლიდერებს არ უნდათ მეზობლები, მათ სურთ, აბსოლუტური ვასალები ჰყავდეთ. დამპყრობლის მეგობარი კი, ვერ გახდები. დამპყრობელი დაგინდობს და გაგამდიდრებს კიდეც, მაგრამ ამისთვის მას თავი უნდა დაუხარო და შენი თანამემამულეებიც უნდა დაუქვემდებარო, საკუთარი ძმების ბატონიც უნდა გახდე და უცხო ძალის მონაც. ჩვენ არ გვინდა ბატონები და მონები ჩვენს ქვეყანაში", - განაცხადა პრეზიდენტმა.
