საპარლამენტო ფრაქცია "ერთობა სამართლიანობის" წევრს, ოპოზიციონერ დეპუტატ ჯონდი ბაღათურიას აინტერესებს, ტელეკომპანია "იმედის" კოლექტივს, რომელიც ახლა პარლამენტშია, სახელმწიფო გადატრიალებასთან დაკავშირებით კითხვებს რატომ არ უსვამენ. ამის შესახებ ბაღათურიამ დღეს ყოფილი დეპუტატის, ვალერი გელბახიანის დაკავების შეფასებისას განაცხადა, რომელსაც ბრალი 2007 წელს სახელმწიფო გადატრიალების მოწყობის მცდელობაში ედება.
დეპუტატის შეფასებით, მიუხედავად იმისა, რომ თავის დროზე ხელისუფლებამ ტელეკომპანია "იმედის" კოლექტივს, ბადრი პატარკაციშვილსა და ვალერი გელბახიანს სახელმწიფო გადატრიალების მცდელობის ბრალდება წაუყენა, ყოფილი დეპუტატი უკანონოდაა დაკავებული.
"პატარკაციშვილი გარდაცვლილია, გელბახიანი - დაპატიმრებული, "იმედის" მთელი კოლექტივი კი პარლამენტშია და მათთვის ერთი შეკითხვაც კი არავის დაუსვამს, აპირებდნენ თუ არა სახელმწიფო გადატრიალებას", - აცხადებს ბაღათურია.
მისი თქმით, "იმედში" შეჭრის ფაქტის გამოსაძიებლად მან პარლამენტის დროებითი საგამოძიებო კომისიის შექმნა მოითხოვა, თუმცა მაშინ ფრაქცია "ქრისტიან-დემოკრატებმა" მის ინიციატივას მხარი არ დაუჭირეს.
შეგახსენებთ, რომ ვალერი გელბახიანი დღეს საქართველო-სომხეთის საზღვარზე დააკავეს.
