"ბოლო 8 საუკუნის განმავლობაში არ ყოფილა ისეთი აღმშენებლობა, როგორც ბოლო 5 წელიწადში", - ამის შესახებ საქართველოს პრეზიდენტმა მიხეილ სააკაშვილმა ცაგერში, მოსახლეობასთან შეხვედრისას განაცხადა. მისი თქმით, საავადმყოფოების გახსნა არის მისთვის მშვენიერი შესაძლებლობა, ისაუბროს იმ პრობლემებზე, რომელიც ახლა არსებობს ქვეყანაში.
"საქართველოში, რა თქმა უნდა, ძალიან დიდი გაჭირვებაა დღეს, საქართველოს ერთი ნაწილი არის ოკუპირებული მტრის მიერ და ეს არ გვაძლევს სიხარულის, ბედნიერების და განცხრომის საშუალებას. მაგრამ ქვეყანა მიდის წინ", - განაცხადა საკაშვილმა.
მისი განცხადებით, არის ხალხი, ვისაც ეს ძალიან არ სიამოვნებს.
"ეს არის ხალხი, ვინც სხვადასხვა ფორმით, ხან ერთი დროშის ქვეშ, ხან მეორე ლიდერის ქვეშ, ხან მესამეს ქვეშ იკრიბება. ეს ხალხი არის ერთი და იგივე მოწყენილი და დაღვრემილი შესახედაობის, პოლიტიკურად მუმიფიცირებული, ის ხალხი ვინც წლების განმავლობაში ჩააბნელა საქართველო, ის ხალხი, ვინც ათწლეულების განმავლობაში არა მხოლოდ 90-იან წლებში, არამედ იმაზე ადრეც, ძარცვავდა საქართველოს. ვინც საზრდოობდა იმით, რომ ყველა დანარჩენი იყო ღარიბი. ამ ხალხს არ სიამოვნებს, რომ მიმდინარეობს აღმშენებლობა, არ სიამოვნებს, რომ ჩვენ ვაშენებთ ახალ ჰიდროელქტროსადგურებს. ადრე დენი იყო მხოლოდ მათ ქუჩაზე, მხოლოდ მათ ჰქონდათ გენერატორი, მხოლოდ მათ შეეძლოთ სახლები ჰქონოდათ განათებული და გამთბარი. ამ ხალხს არ სიამოვნებს ახალი სკოლები, რადგან მხოლოდ მათ შეეძლოთ თავისი შვილებისთვის რეპეტიტორების აყვანა; მხოლოდ მათ შეეძლოთ სახლში მოეყვანათ კერძო მასწავლებლები და კერძო მასწავლებლებთან გაეზარდათ შვილები. მათ არ სიამოვნებთ კომიუტერული პროგრამების და ინგლისურის სწავლება, რადგან კომპიტერები მარტო მათ უნდა ჰქონოდათ და მარტო მათ შვილებს უნდა სცოდნოდათ ინგლისური. მათ არ სიამოვნებთ საავადმყოფოები, რადგან ადრე მხოლოდ რამდენიმე პალატა იყო თბილისში გარემონტებული და მხოლოდ მათ შეეძლოთ იქ მკურნალობა. მათ არ სიამოვნებთ ქართველი ხალხი ზოგადად და ქართველი ხალხის დიდი ნაწილი ჯერ კიდევ არის საკმაოდ გაჭირვებული. ამიტომ წამოაყენეს ახალი ლოზუნგი - გაჭირვებულ ადამიანს არაფერი არ უნდა ეკითხებოდეს თურმე პოლიტიკაში. მათ არ სიამოვნებთ ქუთაისისა და თბილისის განვითარება", - განაცხადა სააკაშვილმა.
პრეზიდენტმა ცაგერში ახალი კლინიკა დაათვალიერა. 25-საწოლიანი საავადმყოფო თანამედროვე სამედიცინო აპარატურით აღიჭურვა. ახლად გახსნილ სამედიცინო ცენტრში პაციენტს ყველა სახის სამედიცინო დახმარების მიღება შეუძლია. კლინიკაში 100-მდე ადამიანია დასაქმებული.