"ეროვნული ფორუმი" მედია-საშუალებაში გავრცელებულ ინფორმაციასთან დაკავშირებით, თითქოს პარტიამ რეფორმებისა და განვითარების ფონდიდან 215, 525 ლარი მიიღო, განმარტებას აკეთებს.
პარტიის ინფორმაციით, კონტროლის პალატის მიერ გამოქვეყნებული "ეროვნული ფორუმის" ფინანსური ანგარიში ზოგიერთ მედია-საშუალებაში არასწორად გაშუქდა. გარკვეულმა უზუსტობებმა, რომელიც საინფორმაციო სააგენტოებსა და ბეჭდურ პრესაში განთავსდა: "გაუგებრობები გამოიწვია. კერძოდ, ფინანსურ ანგარიშში, რომელიც კონტროლის პალატის ოფიციალურ ვებ-გვერდზე გამოქვეყნდა, დაფიქსირებული იყო 21, 525 ლარი, რომელიც პარტიამ რეფორმებისა და განვითარების ფონდიდან მიიიღო, თუმცა მედია-საშუალებებში დაფიქსირდა 215, 525 ლარი, რეალურზე გაცილებით მეტი თანხა. როგორც ჩანს, საქმე გვაქვს ჟურნალისტების მიერ მუშაობის პროცესში დაშვებულ უზუსტობებთან, რომელმაც გარკვეული უხერხულობა შექმნა. 16 თებერვალს პრესაში გავრცელებული ინფორმაცია, თითქოს "ეროვნული ფორუმი" "კონტროლის პალატას ადანაშაულებს შეგნებულად შეცდომის დაშვებასა და შემდეგ ამ შეცდომის გამოსწორებაში", არ შეესაბამება სინამდვილეს. "ეროვნულ ფორუმს" ამ საკითხთან დაკავშირებით კონტროლის პალატასთან რაიმე სახის პრეტენზია არ გააჩნია", - ნათქვამია პარტიის მიერ გავრცელებულ განცხადებაში.