საპარლამენტო უმრავლესობის ერთ-ერთი ლიდერი გიორგი გაბაშვილი ბიძინა ივანიშვილის გუნდში "გაცვეთილი სახეების" გამოჩენას არ გაუკვირვებია. ამის შესახებ უმრავლესობის ერთ-ერთმა ლიდერმა ივანიშვილის პარტიის საინიციატივო ჯგუფის შეფასებისას აღნიშნა.
"იგივე ძველი ოპოზიციური სპექტრია, ძველი იდეებით და გაცვეთილი პოლიტიკური სახეებით", - განაცხადა გაბაშვილმა.
მისი თქმით, მოულოდნელი არ ყოფილა ის, რომ ივანიშვილის გუნდში სიახლე არ არის და მისი წევრები ნინო ბურჯანაძის, ზურაბ ნოღაიდელის და გოგა ხაინდრავას ყოფილი თანაგუნდელები არიან.
შეგახსენებთ, ივანიშვილის პარტიის საინიციატივო ჯგუფში იქნებიან: ჟურნალისტი ელისო ჩაფიძე, საერთაშორისო საქველმოქმედო ფნოდი "ქართუს" პრეზიდენტი ირაკლი ღარიბაშვილი, ადვოკატი არჩილ კბილაშვილი, მწერალი გურამ ოდიშარია, მათემატიკოსი ივანე კიღურაძე, მსახიობი ნინელი ჭანკვეტაძე, ექსპერტი ირაკლი სესიაშვილი, ზურაბ ჟვანიას ძმა, ბიზნესმენი გიორგი (გოგლა) ჟვანია, იურისტი თამაზ აბდალიანი, ადამიანის უფლებათა დამცველი მანანა კობახიძე, ექსპერტი ნოდარ ხადური, ყოფილი საგარეო საქმეთა მინისტრი თედო ჯაფარიძე, ექსპერტი გიორგი ვოლსკი, ყოფილი სპორტსმენი ლერი ხაბელოვი, ნუგზარ დავითაშვილი, იურისტი ზაქარია ქუცნაშვილი და საზოგადოებრივი მოძრაობა "ქართული ოცნების" პრესსპიკერი მაია ფანიჯიკიძე.