საქართველოს პრეზიდენტი პარლამენტში წლიური მოხსენებით, სავარაუდოდ, 14 თებერვალს წარსდგება.
საქართველოს პრეზიდენტმა ყოველწლიური მოხსენება პარლამენტს საგაზაფხულო სესიის პლენარული სხდომების პირველვე დღეს უნდა წარუდგინოს.
აღნიშნული პარლამენტის რეგლამენტის 194 მუხლით რეგულირდება.
რეგლამენტის თანახმად, პარლამენტი, როგორც წესი, საგაზაფხულო სესიის პლენარული სხდომების პირველ დღეს, საქართველოს კონსტიტუციის შესაბამისად ისმენს საქართველოს პრეზიდენტის ყოველწლიურ მოხსენებას ქვეყნის მდგომარეობის უმნიშვნელოვანეს საკითხებზე.
პრეზიდენტის მოხსენების შემდეგ ცხადდება ორსაათიანი შესვენება. შესვენების შემდეგ იწყება ფრაქციების თავმჯდომარეთა გამოსვლები, რომელთა ხანგრძლივობას ადგენს პარლამენტის ბიურო. დებატების შემდეგ შეიძლება მიღებულ იქნეს რეზოლუცია.
აღსანიშნავია, რომ საგაზაფხულო სესიის პირველი სხდომა 14 თებერვალს არის ჩანიშნული.
საპარლამენტო უმრავლესობის ინფორმაციით, კი პრეზიდენტი სააკაშვილი პარლამენტში მოხსენებით მიმდინარე თვეს გამოვა, თუმცა ჯერჯერობით ზუსტი რიციხვი არ სახელდება.
