საპარლამენტო უმრავლესობის ერთ-ერთი ლიდერის გიორგი გაბაშვილის განცხადებით, საქართველოში უმაღლეს თანამდებობებს ფულით ვერავინ იყიდის. როგორც გაბაშვილმა აღნიშნა, ხელისუფლება ყველაფერის გააკეთებს, რომ სამართლიანი და დემოკრატიული არჩევნები ჩაატაროს.
"არჩევნების არსი მდგომარეობს იმაში, რომ ხალხი მანდატით აღჭურავს მას, ვისაც აირჩევს. ეს ასეა ამერიკაშიც, ბრიტანეთშიც და ასე იქნება საქართველოშიც. ვინ იქნება ხელისუფლებაში, ამას ქართველი ხალხი გადაწყვეტს და ყველანაირი სპეკულაცია სხვა დანარჩენზე არასერიოზულია", - აცხადებს გაბაშვილი.
"ვიღაცამ ჩააწყოს ხელისუფლებაში ყოფნა მოსკოვში ან ვაშინგტონში, ან თუ ვინმეს ჰგონია, რომ სადმე ცეკაა, სადაც საქართველოს რაიკომის თავმჯდომარე დაინიშნება, ან ვიღაც იყიდის პოსტებს - ეს გამორიცხულია. ვინ იქნება ხელისუფლებაში, ამას გადაწყვეტს ხალხი თავისუფალ და სამართლიან არჩევნებზე", - დასძინა გაბაშვილმა.
უმრავლესობის წევრი კატეგორიულად გამორიცხავს 2012 წლის საპარლამენტო არჩევნების არასამართლიანად ჩატარებას.
"ეს არჩევნები იქნება 100%-ით სამართლიანი, ისევე, როგორც 2010 წელს არჩევნები, რომელზედაც პირველი პრეცედენტი შეიქმნა და პოლიტიკურმა პარტიებმა შედეგები აღიარეს, ზოგს კი ეყო ღირსება და გამარჯვებულს მიულოცა კიდეც", - დასძინა დეპუტატმა და აღნიშნა, რომ ყველანაირი სხვა სპეკულაცია ამასთან დაკავშირებით სასაცილოა.