ამერიკის შეერთებული შტატებისა და საქართველოს პრეზიდენტების შეხვედრას საქართველოს პრემიერ-მინისტრი უმნიშვნელოვანესს უწოდებს.
როგორც პრემიერ-მინისტრმა ნიკა გილაურმა განაცხადა, ამ შეხვედრაზე რამდენიმე მნიშვნელოვანი მიმართულება გამოიყო.
"მნიშვნელოვანია რომ თავისუფალი ვაჭრობის ხელშეკრულებაზე მოლაპარაკების დაწყების პერსპექტივაზე იყო საუბარი. რაც უმნიშვნელოვანესი იქნება საქართველო-ამერიკის ურთიერთობაში. ჩვენ უკვე დავიწყეთ მოლაპარაკება ევროკავშირთან და სწორედ დღეს არის დამწყები რაუნდი ამ მოლაპარაკებებზე. პერსპექტივაში საქართველო წარმოადგენს სავაჭრო ცენტრს, რომელიც ჩამოყალიბდება აზიასა და ევროპას, აზიასა და აშშ-ს შორის. ცენტრში ბევრ კომპანიას შეეძლება ინვესტიციის განხორციელება მხოლოდ და მხოლოდ იმის გამო, რომ ვაჭრობა იქნება თავისუფალი როგორც ევროკავშირთან ასევე აშშ-სთან და ეს სერიოზული წინსვლა იქნება ქვეყნის ეკონომიკისთვის.
მეორე ფაქტორი, რასაც მინდა ხაზი გავუსვა, ეს არის აშშ-სა და საქართველოს შორის თავდაცვის სფეროში თანამშრომლობა. ამ შემთხვევაში საუბარი არ არის მხოლოდ ანტიტერორისტულ წვრთნებზე, ანუ არ არის საუბარი მხოლოდ ავღანეთში ურთიერთობებზე, საუბარია საქართველოს თავდაცვისუნარიანობის გაზრდაზე, რაც მნიშვნელოვანია ჩვენთვის და ასევე რეგიონის უსაფრთხოებისთვის", - განაცხადა ნიკა გილაურმა.
პრემიერ-მინისტრის განმარტებით, მნიშვნელოვანია ასევე აშშ-ს მხარდაჭერა ჩიკაგოს სამიტზე, სადაც საქართველოს ნატოში გაწევრიანებაზე კიდევ ერთხელ იმსჯელებენ.