საპარლამენტო უმრავლესობის შეფასებით, კრემლის მიერ საქართველოსთან დიპლომატიური ურთიერთობების აღდგენაზე გაკეთებული განცხადება მხოლოდ დასავლეთის მისამართითაა გაკეთებული და მის უკან არაფერი არ დგას.
როგორც მმართველი პარტიის ერთ-ერთმა ლიდერმა, ნუგზარ წიკლაურმა რუსეთის ფედერაციის პრეზიდენტის, დიმიტრი მედვედევის განცხადების კომენტირებისას განაცხადა, თუ რუსეთის ხელისუფლებას მართლაც სურს საქართველოსთან კეთილმეზობლური და დიპლომატიური ურთიერთობების აღდგენა, ამისთვის მთელი რიგი ნაბიჯები უნდა გადადგას.
"ეს არის ოკუპირებული ტერიტორიებიდან საოკუპაციო ჯარების გაყვანა და ქართული მიწების განთავისუფლება, საერთაშორისო ხელშეკრულებებით ნაკისრი ვალდებულებების შესრულება და საქართველოს სუვერენიტეტისა და ტერიტორიული მთლიანობის პატივისცემა. ამის შემდეგ კი საქართველოსა და რუსეთს შორის დიპლომატიური ურთიერთობების აღდგენასთან დაკავშირებით არანაირი პრობლემა არ იქნება, ვინც არ უნდა იყოს ხელისუფლებაში", - აღნიშნა წიკლაურმა.
მისი შეფასებით, პრობლემა ისაა, რომ რუსეთსა და საქართველოს შორის დაპირისპირებაა არა პერსონალურ საკითხზე, არამედ ფუნდამენტურზე, რომელიც ეხება საქართველოს დამოუკიდებლობას.
"მათ არ სურთ სუვერენული საქართველო, რომელსაც აღდგენილი ექნება ტერიტორიული მთლიანობა, ქართველი ხალხის სურვილი კი ესაა. სწორედ ეს არის თავი და თავი ამ პრობლემის და არა ის, რომ რომელიმე ერთ ლიდერს მეორესთან ცუდი ურთიერთობები აქვს", - განაცხადა დეპუტატმა და დასძინა, რომ თუ კრემლი ამ ნაბიჯებს გადადგამს, რაც ძნელად სავარაუდოა, ამ შემთხვევაში ურთიერთობების დაახლოება ძალიან სწრაფად მოხდება.
წინააღმდეგ შემთხვევაში კი, წიკლაურის შეფასებით, რუსეთის ხელისუფლების მხრიდან ეს განცხადება კიდევ ერთი უსარგებლო, პრიმიტიული, რიტორიკულ ხერხია.
"ვფიქრობ, ეს განცხადება, პირველ რიგში, საერთაშორისო ორგანიზაციებისა და სხვადასხვა ქვეყნისკენაა არის მიმართული, რათა კრემლმა წარმოაჩინოს, რომ სურს საქართველოსა და რუსეთს შორის მშვიდობა. სინამდვილეში კი ამის უკან არაფერი არ დგას", - აღნიშნა წიკლაურმა.
