საპარლამენტო უმცირესობის შეფასებით, "მოქალაქეთა პოლიტიკური გაერთიანებების შესახებ" კანონში ხელახალი ცვლილებების განხორციელება საერთაშორისო ზეწოლის დამსახურებაა.
საპარლამენტო უმცირესობის წევრის, ვიცე-სპიკერ ლევან ვეფხვაძის შეფასებით, ხელისუფლებამ კანონში პარტიებთან დაკავშირებულ იურიდიულ პირთან დაკავშირებით არაადეკვატური და იმდენად ზოგადი განმარტება ჩაწერა, ის შეეხო ბევრ საერთაშორისო არასამთავრობო ორგანიზაციას, რომლებიც საქართველოში საქმიანობენ.
"კანონში შესულ ცვლილებებს საერთაშორისო ორგანიზაციების მხრიდან მწვავე შეფასება მოჰყვა. ჩვენს მაგალითზე შემიძლია გითხრათ, რომ ბევრმა ორგანიზაციამ, რომელიც ჩვენთან თანამშრომლობდა, საქმიანობა დროებით გააჩერა და ელოდება, რა იქნება", - აღნიშნა ვეფხვაძემ.
მისი თქმით, ეს ორგანიზაციები პარტიებთან თანამშრომლობას მხოლოდ მაშინ აღადგენენ, თუკი ხელისუფლება შეცვლის სანქციებს, რომელსაც კანონი ითვალისწინებს.
შეგახსენებთ, რომ გასული წლის დეკემბერში პარლამენტმა "მოქალაქეთა პოლიტიკური გაერთინებების შესახებ" კანონში ცვლილებები დაამტკიცა, რომლის მიხედვითაც, მთელი რიგი შეზღუდვები არა მხოლოდ პოლიტიკურ პარტიებს, ასევე მათთან პირდაპირ და არაპირდაპირ დაკავშირებულ იურიდიულ და ფიზიკურ პირებსაც დაუწესდათ.
კანონში უკვე განხორციელებული ცვლილებებთან დაკავშირებით პარლამენტის იურიდიულ საკითხთა კომიტეტის თავმჯდომარე პავლე კუბლაშვილი არასამთავრობო ორგანიზაციის წარმომადგენლებს შეხვდა. შეხვედრაზე არასამთავრობო სექტორმა კიდევ ერთხელ დააფიქსირა, რომ კანონში მთელი რიგი ნორმები ბუნდოვანია, ინტერპრეტაციის საშუალებას იძლევა და მეტ დაკონკრეტებას საჭიროებს, განსაკუთრებით კი პირდაპირ და არაპირდაპირ დაკავშირებული პირების ცნება.
