საპარლამენტო ფრაქცია "ერთობა სამართლიანობის" თავმჯდომარე გიორგი ცაგარეიშვილი პროკურატურასა და კონტროლის პალატას "ნაციონალური მოძრაობის მიერ ხონში "შავი ფულის" დარიგების ფაქტთან დაკავშირებით სადეპუტატო კითხვით მიმართავს და დაუყოვნებლივ სამართლებრივ რეაგირებას სთხოვს. ამის შესახებ ცაგარეიშვილმა "ნაციონალური მოძრაობის" ხონის რაიონულ ორგანიზაციაში ფულის დარიგების ფაქტის დამადასტურებელი დოკუმენტის გამოქვეყნების შეფასებისას აღნიშნა.
მისი თქმით, შესაბამისი ე.წ. უწყისიდან ჩანს, რომ პარტიულ "შავ ყულაბაში" თანხები იკრიბება, რომელიც საბიუჯეტო ორგანიზაციებში დასაქმებული ადამიანების "ხარკისგან" დგება და შემდეგ, ადგილობრივ აქტივისტებზე 50 ლარიდან 300 ლარამდე ნაწილდება, რაშიც სისხლისსამართლებრივი დანაშაული იკვეთება და ეს ქმედება დანაშაული იყო მანამდეც, სანამ "მოქალაქეთა პოლიტიკური გაერთიანებების შესახებ კანონში" ცვლილებები შევიდოდა.
"აქამდეც ამ სქემით მუშაობა უკანონო იყო და თუ გავითვალისწინებთ ახალ რეგულაციებს, ფაქტზე გამოძიება უნდა დაიწყოს. სამართლადამცავები უნდა დაინტერესდეს ამ თანხის წარმომავლობით და თუ გამოძიება მართლაც დაინტერესდება, კვალი საბოლოოდ კახეთის გზატკეცილამდე, ახლად დაბინავებული "ნაციონალური მოძრაობის" ოფისამდე მივა", - აღნიშნა ოპოზიცოონერმა დეპუტატმა.
მისი თქმით, ამ ფაქტით უნდა დაინტერესდეს კონტროლის პალატის ფინასური მონიტორინგის სამსახურის უფროსი ნათია მოგელაძეც, რომელიც ხელისუფლების ხელდასმით ოპოზიციის მდევრად გადაიქცა.
როგორც ცაგარეიშვილმა აღნიშნა, იგი მთავარ პროკურატურას და კონტროლის პალატას "ნაციონალური მოძრაობის" ხონის რაიონულ ორგანიზაციში მიმდინარე პროცესების გამოძიების მოთხოვნით სადეპუტატო წარდგინებას გაუგზავნის.
შეგახსენებთ, რომ გავრცელებული ინფორმაციით, "ნაციონალური მოძრაობის" ადგილობრივი ორგანიზაციის ხელმძღვანელი, პარლამენტარ აკაკი ბობოხიძის ძმა, ლევან ბობოხიძე, თავისი რამდენიმე ხელქვეითის მეშვეობით, საბიუჯეტო ორგანიზაციებში დასაქმებულებისგან ყოველთვე იღებს ხელფასის 15-20%-ს და შემდეგ ეს თანხა პარტიულ აქტივისტებზე ნაწილდება. მედიით ამ ფაქტის დამადასტურებელი დოკუმენტიც გავრცელდა.
