"ბანკი ქართუს" გენერალური დირექტორი ნოდარ ჯავახიშვილი „რუსთავი 2-ის" პირდაპირ ეთერს ითხოვს. როგორც "ბანკი ქართუს" მიერ დღეს გავრცელებულ განცხადებაში ნოდარ ჯავახიშვილი მის წინააღმდეგ წამოწყებულ კამპანიასა და მის მიზეზებზე საუბრობს.
"ჩემ წინაამდეგ წამოწყებულ კამპანიას ორი ძირითადი მიზეზი აქვს. პირველია ის, რომ ბიძინა ივანიშვილის ავტორიტეტი და წარმატება, ახლა უკვე პოლიტიკურ ასპარეზზეც, მოსვენებას არ აძლევს ხელისუფლებას და ყველა საშუალებით ცდილობს მისი გარემოცვის თითოული წევრის დისკრედიტაციას.
მეორე მიზეზი კი ის არის, რომ მიხეილ სააკაშვილს ვერ უპატიებია ჩემთვის _ ეროვნული ბანკის ყოფილი პრეზიდენტისთვის, რომ სწორედ ნოდარ ჯავახიშვილმა განახორციელა წარმატებული ფულის რეფორმა და შექმნა საბანკო სისტემა. სააკაშვილმა ვერ შეძლო იმის გამოცხადება, რომ პირველად საქართველოში მან შემოიღო მყარი ეროვნული ვალუტა _ ლარი", - აღნიშნავს ჯავახიშვილი.
"აბა, სხვა რით შეიძლება იმის ახსნა, რომ ჩვენი ქვეყნის ერთ-ერთ უდიდეს წარმატებას _ რუსული რუბლის განდევნას ქართული საფინანსო სივრციდან, „რუსთავი 2" დანაშაულად მითვლის და რუსული ჯარისთვის დახმარებად ასაღებს. სინამდვილეში კი, დიდი შრომისა და ძალისხმევის ფასად, რუსული სამხედრო ძალები იძულებული გავხადეთ, რუსული რუბლის კონვერტაცია მოეხდინათ და საკუთარი თანამშრომლებისთვის ხელფასი ლარებით გადაეხადათ. ეს იმ დროს დიდი გამარჯვება იყო, რადგან ამით ახალქალაქში რუსული რუბლის ბრუნვა შეიზღუდა და რუსი სამხედროები ლარებით იღებდნენ რუსეთიდან გადმორიცხულ და არა ეროვნული ბანკის მიერ დაფინანსებულ ხელფასს", - ნათქვამია განცხადებაში.
ჯავახიშილი აღნიშნავს, რომ მზად არის უპასუხოს ნებისმიერ ბრალდებასა თუ შეკითხვას. მისივე თქმით, იგი უარს ამბობს „რუსთავი 2"-სთვის ინტერვიუს მიცემაზე.
"მხოლოდ პირდაპირი ეთერის საშუალებით ვუპასუხებ ნებისმიერ შეკითხვას იმის გამო, რომ კონკრეტულად „რუსთავი 2"-თან ურთიერთობის მწარე გამოცდილება მაქვს. კიდევ ერთხელ ვაცხადებ _ მზად ვარ პირდაპირ ეთერში ნებისმიერ ტელეკომპანიას, მათ შორის „რუსთავი 2"-საც, გავცე პასუხი ეროვნულ ბანკში ჩემ საქმიანობასთან დაკავშირებულ ყველა შეკითხვაზე", - აღნიშნავს ჯავახიშვილი.