იურიდიულ საკითხთა კომიტეტის თავმჯდომარის, პავლე კუბლაშვილის მტკიცებით, პოლიტიკური აგიტაციისთვის სანქციები არ არსებობს. როგორც დღეს არასამთავრობო ორგანიზაციების წარმომადგენლებთან გამართულ შეხვედრაზე პოლიტიკური გაერთიანებების დაფინანსების შესახებ კანონზე მსჯელობისას კუბლაშვილმა განაცხადა, თუ პირს აქვს შპს და იგი არ უკავშირდება პოლიტიკურ მოძრაობას, მისი ხელმძღვანელის მხარდაჭერა რომელიმე პარტიისთვის არ იზღუდება.
მისი განმარტებით, აგიტაციის გაწევის გამო არავინ დაისჯება, მაგრამ თუკი შპს-ის ხელმძღვანელი მის მიერ დაქირავებულებს რაიმე სახით იყენებს პოლიტიკური მიზნებისთვის, შპს კი არ დაიხურება, უბრალოდ, მოექცევა ფინანსური გამჭვირვალობის ქვეშ.
არასამთავრობო ორგანიზაციების წარმომადგენლებისთვის გაუგებარი აღმოჩნდა კუბლაშვილის განმარტებები. მათი განცხადებით, პოლიტიკური აგიტაცია გავლენას ახდენს არჩევნების შედეგებზე, შესაბამისად, კანონის რეგულაციით იგი იზღუდება. კუბლაშვილი ოპონენტებს ურჩევს კანონი იმ კუთხით წაიკითხონ, რომ მათთვის ყველაფერი გასაგები იყოს.
მისი თქმით, არასამთავრობო ორგანიზაციებს მუდმივი კომუნიკაცია უნდა
ჰქონდეთ კონტროლის პალატასთან და პრაქტიკაში დააკვირდნენ აღნიშნული კანონის გამოყენებას.
