საქართველოს უშიშროების საბჭოს მდივან გიგა ბოკერიას განცხადებით, ვარაუდი იმის თაობაზე, რომ აშშ-ს და საქართველოს შორის თავდაცვის სფეროში თანამშრომლობის დაქვეითება მოხდა ბოლო წლების განმავლობაში, შეთხზული და არაზუსტია.
როგორც მან ჟურნალ „ტაბულასთან" ვიდეო ინტერვიუში პრეზიდენტ ობამას ადმინისტრაციის მიერ გაკეთებული დათქმა აშშ-ის 2012 წლის თავდაცვის ავტორიზაციის აქტის იმ ნაწილზე, რომელიც საქართველოსთან სამხედრო თანამშრომლობის ნორმალიზაციისკენ მოუწოდებს, მათ შორის თავდაცვითი იარაღის მიყიდვის გზით, უფრო სამართლებრივი საკითხია საკანონმდებლო და აღმასრულებელი შტოების კონსტიტუციური უფლებამოსილებების შესახებ და არ უნდა მოხდეს მისი იმგვარი ინტერპრეტირება, თითქოს ობამას ადმინისტრაცია საქართველოსთან თავდაცვის სფეროში თანამშრომლობის გაღრმავების წინააღმდეგია.
„ჩვენ, რა თქმა უნდა, ძალიან მადლობელი ვართ ყველა ჩვენი მხარდამჭერის, მათ შორის იმ ადამიანების, ვინც შეერთებული შტატების სენატში საქართველოსთან სამხედრო თანამშრომლობის გაღრმავებისკენ ამ ტიპის ჩანაწერს დაუჭირა მხარი. ისინი ჩვენი დიდი ხნის მეგობრები არიან. ამასთან ერთად, მინდა ვთქვა, რომ ის სპეკულაცია, რომ პრეზიდენტ ობამას ადმინისტრაციის მიერ გაკეთებული დათქმა ამ აქტზე უკავშირდებოდა საქართველოს, როგორც წესი, ვერ ცოდნა არის საკითხის, ვინც ეს კომენტარი გააკეთა. იმიტომ, რომ ამ შემთხვევაში საკითხი არ ეხებოდა რომელ ქვეყანაზეა ლაპარაკი ან რა საკითხებზე. ეს არის დისკუსია იურისდიქციასთან დაკავშირებით. ანუ აქვს თუ არა კონგრესს უფლება, რომ ასეთ საკითხებზე... მიუთითოს აღმასრულებელ ხელისუფლებას, ამ შემთხვევაში პრეზიდენტს, როგორი უნდა იყოს პოლიტიკა. ამას შეეხება ეს დათქმა და არა იმას, რომ საქართველოსთან დაკავშირებით არ უჭერენ მხარს გაღრმავებას სამხედრო თანამშრომლობის... ეს ასე არ არის", - განაცხადა ბოკერიამ.
მისი თქმით, თავდაცვის სფეროში საქართველოსა და აშშ-ს შორის თანამშრომლობის გაღმავების ტენდენციაა.
„ეს თანამშრომლობა ღრმავდება და ეს შეეხება, ბუნებრივია, როგორც ავღანეთში მიმდინარე სამშვიდობო ოპერაციას იმიტომ, რომ ეს არის მსოფლიოსთვის, მისი უსაფრთხოებისთვის მნიშვნელოვანი ოპერაცია, ჩვენი ინტერესებისთვის მნიშვნელოვანი ოპერაცია, ჩვენ გვაქვს ჩვენი წვლილი ამ საქმეში, მაგრამ შეეხება ამ ფარგლებს გარეთაც არსებულ თანამშრომლობას. დიახ, წვრთნებს და ამ ტიპის დახმარებას დიდი ადგილი ეკავა, თუმცა ეს არ არის ერთადერთი სფერო, რომლის ფარგლებშიც თანამშრომლობა მიმდინარეობდა, მიმდინარეობს და გაღრმავდა ამ ბოლო პერიოდშიც კი. მე არ მინდა ყველა დეტალზე ვისაუბრო, მაგრამ ის სურათი, თითქოს ამ თვალსაზრისით არის სტაგნაცია ან პირიქით, უკან სვლა არის არაზუსტი. ყველას, ვინც მხარს უჭერს ამ ურთიერთობის კიდევ უფრო გაღრმავებას, მათ შორის შეერთებული შტატების შიგნით, პოლიტიკურ სპექტრში, მათ მიმართ ჩვენ უაღრესად მადლობელი ვართ. ამავე დროს, მადლობელი ვართ იმ თანამშრომლობის, რომელიც გვაქვს ადმინისტრაციასთან", - განაცხადა ბოკერიამ.
