26-28 იანვარს საქართველოს გაეროს გენერალური მდივნის მოადგილე რებეკა გინსპანისი და გაეროს განვითარების პროგრამის ევროპისა და რუსეთის ბიუროს დირექტორი კორი უდოვიცკი ეწვევიან. ამის შესახებ საგარეო საქმეთა მინისტრის მოადგილემ ნინო კალანდაძემ დღეს, ორშაბთის ტრადიციულ ბრიფინგზე განაცხადა.
მისი თქმით, ვიზიტის მთავრი მიზანია, საქართელოს მთავრობასთან ერთად შემუშავდეს სამომავლო გეგმები და პროგრამები, ასევე მოხდეს არსებული პროგრამების შეფასება, რომელიც საქართველოში ამ დრომდე ხორცილდებოდა.
„გაეროს განვითარების პროგრამა უკვე ორი ათეული წელია საქართველოს მნიშვნელოვან დახმარებას უწევს სხვადასხვა მიმართულებით. ამ ეტაპზე განსაკუთრებული ყურადღება ჯანდაცვისა და განათლების სფეროებს დაეთმება", - აღნიშნა კალანდაძემ.
მისივე თქმით, ვიზიტის ფარგლებში მხარეები ასევე განიხილავენ ოკუპირებულ ტერიტორიებზე გაეროს განვითარების პროგრამების შესაძლო განხორციელების საკითხებსაც.
„გაეროს დელეგაცია როგორც საკანონმდებლო ორგანოში, ასევე მთავრობის წარმომადგენლებთანაც გამართავს შეხვედრებს", - აცხადებს მინისტრის მოადგილე.
