მთავრობა მორიგ ამნისტიას აცხადებს. როგორც დღეს ფინანსთა მინისტრმა რუსუდან კემულარიამ სამინისტროში გამართულ ბრიფინგზე განაცხადა, "საგადასახადო კოდექსში" 2011 წელს განხორციელებული ცვლილების შესაბამისად, გათვალისწინებულ იქნა 2005 წლამდე წარმოშობილი საგადასახადო დავალიანების პატიების მექანიზმი.
"შემოსავლების სამსახური უფლებამოსილია საქართველოს ფინანსთა მინისტრის მიერ დადგენილი წესით ჩამოწეროს საგადასახადო დავალიანება, მასზე დარიცხული საურავი და ჯარიმა, თუ იგი საქართველოს საგადასახადო კანონმდებლობით არ ითვლება აღიარებულად, აღნიშნული დავალიანების თანხის დარიცხვასთან დაკავშირებით გადამხდელისათვის არ ყოფილა წარდგენილი საგადასახადო ორგანოს შეტყობინება/საგადასახადო მოთხოვნა და გასულია მისი წარდგენის 6-წლიანი ხანდაზმულობის ვადა"- განაცხადა რუსუდან კემლუარიამ.
მისივე ინფორმაციით, ფინანსთა მინისტრის მიერ დადგენილი წესით ჩამოწერას ექვემდებარება 2005 წლის 1 იანვრამდე წარმოშობილი საურავი და ჯარიმა, თუ გადახდილია 2005 წლის 1 იანვრისათვის რიცხული ყველა გადასახადის ძირითად ნაწილში არსებული აღიარებული საგადასახადო დავალიანების თანხა და პირს 2005 წლის 1 იანვრის შემდგომი პერიოდისათვის საგადასახადო ორგანოში არ წარუდგენია საგადასახადო დეკლარაცია.
"ფინანსთა მინისტრის მიერ განსაზღვრული წესის შესაბამისად, თუ დავის განმხილველი ორგანოს მიერ დადგენილია, რომ არსებობს საგადასახადო დავალიანების ჩამოწერის ზემოაღნიშნული საფუძველი, დავის განმხილველი ორგანოს გადაწყვეტილებით იწყება საგადასახადი დავალიანების ჩამოწერასთან დაკავშირებული ადმინისტრაციული წარმოება", - განაცხადა რუსუდან კემულარიამ.
კელუარიას განმარტებით, ერთი კვირის განმავლობაში სამინისტროს დავალიანების ჩამოწერისთვის უკვე 3 ათასმა სუბიექტმა მიმართა.
