ბიძინა ივანიშვილის მეუღლემ, ეკატერინე ხვედელიძემ პირველი კომენტარი გააკეთა, მას შემდეგ რაც ცნობილი გახდა, რომ პოლიტიკური პარტიის შექმნა აქვს გადაწყვეტილი და პარლამენტის წევრობა სურს.
"მე ახლა არ მოვსულვარ, მე პოლიტიკაში ჩემ მეუღლესთან ერთად მოვედი. ეს იყო ოჯახური გადაწყვეტილება და შესაბამისად ჩვენ ყველანი მზად ვიყავით, რომ გარკვეულ მომენტში ჩვენ გარკვეული პასუხისმგებლობა აგვეღო საკუთარ თავზე. დღეს დადგა ისეთი მომენტი, რომ ჩემ მეუღლეს უზღუდავენ პოლიტიკურ მოქმედებას, აქტიურობას და შესაბამისად მე გავაკეთებ, ჩემი შესაძლებლობებიდან გამომდინარე ყველაფერს, რაც კარგი იქნება ჩემი ოჯახისთვის და ჩემი სამშობლოსათვის. მემგონი ყველაფერი გამოგვივა, იმიტომ რომ საქართველოს ისტორიის ფურცლებზე ქალბატონების მოღვაწეობას თუ გადავხედავთ, დამეთანხმებით, რომ ქალბატონები ყოველთვის გამოირჩეოდნენ და დღესაც გამოირჩევიან პრინციპულობით, მიზანდასახულობით, საქმისადმი თავდადებით. იმედი მაქვს, დღევანდელი ხელისუფალნი ისეთ კანონს ვერ მიიღებენ, რომ ჩემ მეუღლეს აუკრძალავს რომ რჩევა მომცეს ან გარკვეულ მომენტში გადაწყვეტილების მიღებაში დამეხმაროს. ასე, რომ მე არაფრის არ მეშინია და ყველაფრისთვის მზად ვარ", - განაცხადა ეკატერინე ხვედელიძე-ივანიშვილმა.
პოლიტიკურ გეგმებზე და მეუღლის პოლიტიკაში მოსვლის შესახებ თავად ბიზნესმენმაც ისაუბრა.
"ჩემი ოჯახი ძალიან დემოკრატიულია, ოჯახში ჩვენ ყველაფერს ვწყვეტთ ერთად და შეთანხმებით, როდესაც მე განცხადება გავაკეთე პოლიტიკაში შემოსვლის, რა თქმა უნდა, მთელი ჩემი ოჯახი ამ გადაწყვეტილებაში იღებდა მონაწილეობას. პატარა ცოტნეც კი აცნობიერებდა, რომ მამიკოს ისე ხშირად ვერ ნახავდა, რამდენსაც ნახულობდა. შესაბამისად ჩემი მეუღლე იყო პირველი ახლო მეგობარი და მრჩეველიც. რა თქმა უნდა, ეს გადაწყვეტილება მივიღეთ ერთხმად და შეგნებულად. ეს იქნება ეკა ხვედელიძე-ივანიშვილი. ჩემი გვარია საჭირო, რადგანაც მოსახლეობას ჩემი გვარი აინტერესებს დღეს და სხვა გვარი არც განიხილებოდა", - განაცხადა ივანიშვილმა.
ბიძინა ივანიშვილმა იმ გარემოცვაზეც ისაუბრა, რომელიც მან პოლიტიკაში მოსვლის დღიდან შემოიკრიბა.
"ძალიან კარგი გარემოცვა მყავს, ფიქრობენ, რომ ვიღაცეები მე რაღაცეებს მაწყვეტინებენ. მე ასეთი კაცი არ ვარ, 10 წლიდან დამოუკიდებლად გავიზარდე. 12 წლის უკვე მეზობელ ქვეყნებში სამუშაოდ დავდიოდი სკოლის არდადეგებზე და ძალიან დამოუკიდებელი ვარ. ის რაც არ მომწონს ვერავინ ვერ გადამაწყვეტინებს. ყველა სიტყვას, რომელიც გადაწყვეტილია აბსოლუტურად გააზრებულია და ბოლო სიტყვას მე ვამბობ", - განაცხადა ივანიშვილმა.
კომენტარები ეკარერინა ხვედელიძემ და ბიძინა ივანიშვილმა ქართული თეატრის დღეს - 14 იანვარს გააკეთეს. საღამო აკაკი ხორავას სახელობის სახლში გაიმართა.
