18-19 იანვარს საქართველოს საგარეო საქმეთა სამინისტრო ირლანდიასთან ორმხრივ პოლიტიკურ კონსულტაციებს გამართავს.
ამის შესახებ დღეს, ორშაბათის ტრადიციულ პრესკონფერენციაზე საგარეო საქმეთა მინისტრის მოადგილემ ნინო კალანდაძემ განაცხადა.
მისი თქმით, აღნიშნულ კონსულტაციებს განსაკუთრებული მნიშვნელობა აქვს, რადგან ირლანდია ამ წლის იანვრიდან ეუთოს თავმჯდომარე ქვეყანაა, ამის გათვალისწინებით კი ბევრი საკითხი დგას დღის წესრიგში.
„ამასთან, ჩვენ მივესალმებით ირლანდიის მიერ გაჟღერებულ პრიორიტეტულ მიმართულებებს, რომელშიც ასახულია საქართველოს ოკუპირებულ ტერიტორიებზე ეუთოს მისიის აღდღენის საკითხი. ასევე აღნიშნულია, რომ განსაკუთრებულ ყურადღებას დაუთმობს ოკუპირებულ ტერიტორიებზე ადამიანის უფლებების დარღვევის ფაქტებსა და საკუთარ სახლებში დევნილების ღირსეულ და უსაფრთხო დაბრუნების საკითხებს", - განაცხადა კიალანდაძემ.
მისივე თქმით, შეხვედრაზე გარდა ეუთოს ფარგლებში განსახორციელებელი საკითხებისა, ასევე განიხილება ორ ქვეყანას შორის არსებული ორმხრივი ურთიერთობებიც.
