საქართველოს პრეზიდენტის პრესსპიკერის, მანანა მანჯგალაძის განცხადებით, 2012 წელი იქნება იმ გამოწვევებზე პასუხის გაცემის წელი, რომელიც საქართველოში არსებულ გაჭირვებასა და უმუშევრობას უკავშირდება
როგორც მან დღეს გამართულ ტრადიციულ ბრიფინგზე განაცხადა, მიუხედავად ქვეყანაში განხორციელებული რეფორმებისა და პროგრესისა, კიდევ არსებობს უამრავი პრობლემა.
"ათასობით ჩვენი თანამემამულე უმუშევარია. ბევრი ადამიანი ჯერ კიდევ ცხოვრობს გაჭირვებაში. სწორედ ამიტომ 2012 წელი იქნება ამ მიმართულებით გამოწვევებისა და პასუხის გაცემის წელი", - განაცხადა მანჯგალაძემ.
გარდა ამისა, დღეს გამართულ ბრიფინგზე მანჯგალაძემ 2012 წელს საქართველოში გატარებულ რეფრომებზეც ისაუბრა. მისი თქმით, 2011 წელი განსაკუთრებული იყო ბევრი თვალსაზრისით. განსკაუთრებით კი რეფორმების გაგრძელების კუთხით და ქვეყნისთვის სასიცოცხლოდ მნიშვნელოვანი პროექტების განხორციელებით.
"2011 წელს ქვეყანამ 6,5-პროცენტიანი ეკონომიკური ზრდა განიცადა. საერთაშორისო სააგენტოებმა უმაღლესი შეფასება მისცეს საქართველოში რეფორმების გაგრძელებას. რეფორმები გაგრძელდება განათლების სფეროში, სოფლის მეურნეობაში, ჯანდაცვის სფეროსა და პენიტენციალურ სისტემაში, ასევე იუსტიციის სისტემაში. ჩვენმა რეფორმებმა სერიოზული ინტერესი გამოიწვია. მარტო წელს იუსტიციის ახალი 4 სახლი ამოქმედდა, შეიძლება ითქვას, რომ საქართველო ლიდერი და სამოდელო ქვეყანა აღმოჩნდა. წელს ქუთაისში დაიწყო ფუნქციონირება მთავრობის სახლმა. მომავალ წელს კი პარლამენტის ახალი შენობის მშენებლობა დასრულდება" - განაცხადა მანჯგალაძემ.
მისივე თქმით, 2011 წელი მნიშვნელოვანი იყო ტურიზმის განვითარების კუთხით. პრესსპიკერის ინფორმაციით, აღნიშნულ წელიწადში საქართველოს 2 მილიონ 756 ათას 669 ვიზიტორი ჰყავდა.
"ამ კუთხით მნიშვნელოვანი იყო ის კვლევა, რომელიც ევროკავშირის დაფინანსებით ჩატარდა დანაშაულისა და უსაფრთხოების კუთხით. კვლევამ დაადასტურა, რომ საქართველო გახდა ევროპის ერთ-ერთი უსაფრთხო სახელმწიფო. მოგეხსენებათ, რომ უსაფრთხოება ტურისტებისთვის ისევე როგორც ბიზნესმენებისთვის ერთ-ერთი მთავარი საკითხია", - განაცხადა მანჯგალაძემ.
მისი თქმით, განხორციელებულ პროექტებს შორის აღსანიშნავია რეფორმები ჰოსპიტალის სექტორში. აღმაშენებლის გამზირის რეაბილიტაცია. მანჯგალაძის ინფორმაციით, 2012 წელს დაიწყება, პრაქტიკულად, ახალი უბნის მშენებლობა თბილისში და მისივე თქმით, 2012 წელი იქნება სრული ინფრასტრუქტურული მშენებლობის წელი.
მანჯგალაძემ ასევე ისაუბრა გზების მშენებლობაზე და სვანეთისა და დანარჩენი საქართველოს დამაკავშირებელ გზას ისტორიული უწოდა. მან ასევე აღნიშნა, საპენსიო რეფორმების შესახებ და პენსიონერთა და 0-დან 5 წლამდე ბავშვების დაზღვევის შესახებ. პრეზიდენტის პრესსპიკერი შეეხო სპორტის თემასაც და აღნიშნა, რომ 2012 წელს საქართველოს კალათბურთისა და რაგბის ნაკრებებისთვის ძალიან წარმატებული წელი იყო.