საქართველოს პრეზიდენტის პრესსპიკერი მანანა მანჯგალაძე 2011 წელს საგარეო ურთიერთობების თვალსაზრისით მნიშვნელოვნად აფასებს. როგორც დღეს გამართულ ტრადიციულ ბრიფინგზე მანანა მანჯგალაძემ განაცხადა, აღსანიშნავია ის ურთიერთობა საქართველოსა და ნატოს შორის, რომელიც ახალ რეჟიმზეა გადასული.
"ამ მხრივ, ძალიან საყურადღებო იყო ნატოს გენერალური მდივნის ვიზიტი საქართველოში და ის შეფასებები, რომელიც გაკეთდა ნატოს გენერალური მდივნის მხრიდან. საყურადრებო იყო ნატო საქართველოს კომისიის სხდომა და ის მოსაზრებებო, რომ საქართველო კიდევ უფრო ახლოსაა ნატოში გაწევრიანებასთან, ვიდრე გასული წლების განმავლობაში. ასევე გრძელდება აისაფის ფარგლებში თანამშრომლობა. ხაზგასმით მინდა აღვნიშნო ის ურთიერთობები რომელიც ჩამოყალიბდა საქართველოსა და ევროკავშირს შორის. ეს ეხება სავიზო რეჟიმის გამარტივებას, ღრმა და ყოვლისმომცველი ვაჭრობის შესახებ მოლაპარაკებების დაწყებას", - განაცხადა მანჯგალაძემ.
მან გამოყო რამდენიმე ვიზიტი საქართველოში. მათ შორის საფრანგეთის პრეზიდენტის და განაცხადა რომ ნიკოლა სარკოზს სიტყვით გამოსვლა იყო ისტორიული.
"ასევე გამოვყოფდი სხვა მეგობარი და პარტნიორი ქვეყნების ვიზიტებს. ვფიქრობ ცალკე უინდა აღინიშნოს ევროპარლამენტის მიერ მიღებული რეზოლუცია, რომელიც მყარ საფუძველს ქმნის საქართველოსა და ევროკავშირს შორის დაახლოების კუთხით. მე შეგახსენებთ, რომ 2011 წელი იყო გამორჩეული იმითაც, რომ პირველად დაიწყო საუბარი ევროკავშირში გაწევრიანების შესახებ. საყურადღებო იყო რეზოლუციაც რომლითაც ევროკავშირის ქვეყნებმა სამხრეთ ოსეთის და აფხაზეთის ოკუპაცია აღიარა რუსეთის მხრიდან. არაერთმა სახელმწიფომ და პარლამენტმა ოკუპაციის აღიარების სერიას დაუდო სათავე. ასევე გამოვყოფდი აშშ-ს სენატის მიერ მიღებულ რეზოლუციასაც და საყურადღებო იყო პოლონეთის პრემიერის შეფასებები საქართველოს თაობაზე. გარდა ამისა, საქართველო აღმოსავლეთ პარტნიორობის ფარგლებში აგრძელებს თანამშრომლობას ევროკავშირთან", - განაცხადა მანჯგალაძემ.
მისივე თქმით, გამორჩეული იყო 2011 წელი საქართველოსთვის მეზობლებთან დაახლოების კუთხითაც. მანჯგალაძის განმარტებით, 2011 წელს კიდევ უფრო განმტკიცდა ურთიერთობა სომხეთთან, აზერბაიჯანსა და თურქეთთან.
