"ქრისტიან-დემოკრატები" დამწვრობის ცენტრისთვის შესაბამისი სტანდარტების და პირობების შექმნას ითხოვენ. როგორც დღეს, რიგგარეშე სხდომაზე "ქრისტიან-დემოკრატების" წევრმა მაგდა ანიკაშვილმა აღნიშნა, მიუხედავად იმისა, რომ ჯანდაცვის მინისტრმა დამწვრობის ცენტრის თანამშრომლებს დაპირება მისცა, რომ არც ერთი კვალიფიციური სპეციალისტი დაუსაქმებელი არ დარჩება, რეალაურად მინისტრის დაპირება სიცრუე აღმოჩნდა და ახლა შენობაში გადასვლის შემდეგ ცენტრის თანამშრომლების 80% სამსახურის გარეშე დარჩა.
"როგორც ხელისუფლებას ჩვევია დამწვრობის ცენტრთან მიმართებაშიც მტკივნეული და ხისტი გადაწყვეტილება მიიღო. ჩვენთვის გაუგებარია ახლი წლის წინ რატომ გამოავლინა მთავრობა სიჯიუტე და ცენტრის თანამშრომლებს დღესასწაულის წინ მოუსპო ყველანაირი საარსებო წყარო", - აღნიშნა ანიკაშვილმა და აქვე დასძინა, რომ ხელისუფლება, როდესაც მუდმივად დასაქმებაზე საუბრობს, ამ დროს იქცევა პარადოქსულად და სამსახურის გარეშე ტოვებს ხალხს.
ამასთან, ოპოზიციონერმა დეპუტატმა ასევე ისაუბრა დამწვრობის ცენტრის ახლა შენობაში გადასვლის შემდეგ წარმოშობილ პრობლემებზე და აღნიშნა, რომ ხელისუფლება არ ითვალისწინებს სპეციალისტების რეკომენდაციებს, რის გამოც მომსახურების ხარისხი შეიძლება კითხვის ნიშნის ქვეშ დადგეს.
"მოუწოდებთ ხელისუფლებას, რომ გაითვალისწინოს სპეციალისტების რეკომენდაცია და ახალ შენობაში მაინც შეიქმნას შესაბამისი სტანდარტები და პირობები", - მიმართა ხელისუფლებას ანიკაშვილმა.
