ფრაქცია "ქრისტიან-დემოკრატების" თავმჯდომარე გიორგი ახვლედიანი ჰიბრიდულ სიმინდთან დაკავშირებით სადეპუტატო კითხვით სოფლის მეურნეობის სამინისტროს კორპორაციას, ასევე სამინისტროსა და მთავრობას მიმართავს.
როგორც დღეს, პარლამენტის რიგგარეშე სხდომაზე ახვლედიანმა აღნიშნა, 20 ათასი ფერმერი, რომელმაც ხელისუფლების გაუაზრებელი ქმედების გამო ჰიბრიდული სიმინდის დათესეს და სერიოზულად იზარალეს, ერთადერთი შვება მათთვის თესლის ფულის არგადახდა იყო, რასაც პრეზიდენტი რამდენიმე დღის წინ დაჰპირდა კიდეც.
"პრეზიდენტმა მარტვილში გამოსვლის დროს აღნიშნა, რომ ფერმერები ვინც დაზარალდა სიმინდის თესლის ფულს არ გადაიხდიდნენ, თუმცა სააკაშვილის დაპირება მხოლოდ სიტყვებად დარჩა. ნიშანდობლივია, რომ ბოლო დროს მთავრობა და უმრავლესობა პრეზიდენტის სიტყვას არაფრად აგდებს და როგორც უნდა ისე იქცევა", - აღნიშნა დეპუტატმა და აქვე დასძინა, რომ ფერმერებს ბანკებთან უკვე სერიოზული პრობლემები შეექმნათ და მათ მიწებს და ქონებას, რომელიც გირაოში აქვთ ჩადებული გაყიდვა ემუქრება.
ამასთან, ახვლედიანი ეჭვს გამოთქვამს, რომ კორპორაციისგან ნაყიდი ჰიბრიდული სიმინდის თესლი უხარისხო იყო, შესაბამისად ამან ფერმერების ზარალი გამოიწვია.
"ჩვენ ვცდილობდით შეგვემოწმებინა თესლი, თუმცა ყველა ლაბორატორიამ უარი გვითხრა, რაც გარკვეულ ეჭვებს ბადებს. მოუწოდებთ სოფლის მეურნეობის სამინისტროს ჩვენი მონაწილეობით შემოწმონ ჰიბრიდული სიმინდის თესლი და დასკვნა დადონ", - განაცხადა გიორგი ახვლედიანმა.
დღესვე დეპუტატმა სოფლის მეურნეობის სამინისტროს კორპორაციას, სამინისტროს და მთავრობას სადეპუტატო კითხვით მიმართა, კერძოდ კი ახვლედიანს აინტერესებს აპირებს თუ არა ხელისუფლება დაზარალებული ფერმერები ჰიბრიდული სიმინდის თესლში გადასახდელი თანხებისგან გაანთავისუფლოს.
აღნიშნულთან დაკავშირებით პარლამენტის თავმჯდომარემ დავით ბაქრაძემ საორგანიზაციო კომიტეტის დეპუტატის კითხვის გადაგზავნა დაავალა.