გენეტიკურმა ექსპერტიზამ არ დაადასტურა ის ფაქტი, რომ საქართველოს მიერ რუსეთისათვის გადაცემული ნარჩენები 2008 წლის რუსეთ-საქართველოს ომის დროს ჩამოგდებულ რუს მფრინავს კოვენცოვს ეკუთვნის. ინფორმაციას ამის შესახებ რუსული მედია ავრცელებს.
მათივე ინფორმაციით, დღემდე უგზო -უკვლოდ დაკარგულად ითვლებიან 2008 წლის რუსეთ-საქართველოს ომის დროს დაკარგულები პოდპოლკოვნიკი ალექსანდრე კოვენცოვი და სერჟანტი ალექსეი ლედჟიევი. შორს ფრინავე ბომბდამშენის "ტუ-22მ3"-ის მფრინავი ალექსანდრე კოვენცოვი ომის პირველივე დღეებში ჩამოაგდეს. სერჟანტ ლედჟიევის გაუჩინარების გარემოებები კი უცნობია.
"მოსკოვში სპეციალისტების მიერ ჩატარებულმა ექსპერტიზამ აჩვენა, რომ საქართველოს მიერ გადმოგზავნილი მასალა უგზო-უკვლოდ დაკარგულ პოდპოლკოვნიკ კოვენცოვს არ ეკუთვნის", _ იუწყება რუსული მედია.
შედარებისათვის აღებული იყო დაკარგული მფრინავის დედის, შვილებისა და მეუღლის მონაცემები. ექსპერტიზა რუსეთის თავდაცვის სამინისტროს სასამართლო-სამედიცინო და კრიმინალისტიკური ექსპერტიზის ცენტრმა ჩაატარა.
აღსანიშნავია, რომ 1971 წელს დაბადებული პოლკოვნიკი კოვენცოვი რუსეთ-საქართველოს ომის პირველივე დღეებში ჩამოაგდეს. აგვისტოს დასაწყიში, რუსეთის თავდაცვის სამინისტრომ გააკეთა განცხადება იმასთან დაკავშირებით, რომ შესაძლოა მფრინავის ნარჩენები თბილისის მორგში არსებულ გაურკვეველ ცხედრებს შორის იყოს, თუმცა მფრინავის ბედის დადგენის დროს ეს ინფორმაცია უარყოფილი იყო.