ფრაქცია "ქრისტიან-დემოკრატების" წევრი, ვიცე-სპიკერი ლევან ვეფხვაძის განცხადებით, საინტერესოა რას აპირებს მთავრობა, როცა ბიძინა ივანიშვილის ფონდის მიერ სახელოვნებო წრეების დაფინანსება შეწყდება.
აღნიშნულის შესახებ დღეს, პარლამენტის რიგგარეშე სხდომაზე ლევან ვეფხვაძემ "მოქალაქეთა პოლიტიკური გაერთიანებების" შესახებ კანონპროექტზე საუბრისას განაცხადა.
აღნიშნული პროექტით, პოლიტიკურ პარტიებთან დაკავშირებულ იურიდიულ პირებსაც იგივე შეზღუდვები უწესდებათ, რაც პოლიტიკურ პარტიებს. შედეგად, არასაარჩევნო პერიოდშიც, ბიძინა ივანიშვილის ფონდს იმ ადამიანების დაფინანსება აეკრძალება, ვისაც აქამდე აძლევდა დახმარებას.
"მინდა მივმართო მთავრობას, რადგან სერიოზული პრობლემის წინაშე შეიძლება აღმოჩნდნენ მწერლები, მსახიობები, სიმფონიური ორკესტრის წევრები, მომღერლები, სპორტსმენები. მაინტერესებს, რას აკეთებს მთავრობა იმისთვის, რომ ამ ადამიანებს ყოველდღიური სოციალური მდგომარეობა არ გაუარესდეთ", - აღნიშნა ვეფხვაძემ.
აღნიშნულ საკითხზე ვიცე-სპიკერმა მთავრობას სადეპუტატო კითხვით მიმართა, კერძოდ კი წარმოადგინონ ინფორმაცია, თუ რას აპირებენ ამ დანაკლისის შესავსებად.
შეგახსენებთ, რომ "მოქალაქეთა პოლიტიკური გაერთიანებების" შესახებ კანონპროექტს პარლამენტის დღეს პირველი მოსმენით განიხილავს.
