"მთავარი, რაც უნდა შეიცვალოს, ეს არის ხალხის დასაქმების საკითხი - ეს არის გადამწყვეტი", _ განაცხადა საქართველოს პრეზიდენტმა მიხეილ სააკაშვილმა დღეს გლდანი-ნაძალავის რაიონის სკოლების პედაგოგებთან შეხვედრისას მასწავლებელთა სახლში.
"თბილისის ზოგიერთ გარეუბანში უმუშევრობა თითქმის 30%-ია. მე ბევრი ვიფიქრე, თუ რა და როგორ შეიძლება გაკეთდეს და ვფიქრობ, რომ ცალკე აღებული გლდანი და თბილისის რამდენიმე გარეუბანი უნდა ავიყვანო ჩემი უშუალო პატრონაჟის ქვეშ და დავიწყოთ მასშტაბური გადამზადება ყველა ასაკის ადამიანებისა მათი შემდგომი პროფესიული ორიენტაციისა და საერთოდ ცხოვრებაში რაღაც საქმის პოვნის მიზნით", _ განაცხადა საქართველოს პრეზიდენტმა მასწავლებლებთან შეხვედრისას.
მისი თქმით, რომ ხშირად არის, რომ ადამიანებს აქვთ უნივერსიტეტები დამთავრებული, ზოგს უბრალოდ ტექნიკური სასაწავლებლები, ზოგს არაფერი არ აქვს დამთავრებული ზის სახლში და არაფერს არ ეძებს.
"ის უკვე შეჩვეულია, რომ ეს ასეა, ათი წელი არაფერი არ ჰქონია და საქმე მას არ აქვს. ამიტომ შემოგვაქვს ჩვენ პროფესიული ორიენტაციაც. მე მართლაც ავიყვან ჩემს კონტროლზე ამ სასწავლებელს, შეთავსებით გავხდები მისი დირექტორი - კონსტიტუცია არ კრძალავს, რომ პრეზიდენტი ერთდროულად იყოს ტექნიკური სასწავლებლის დირექტორი და დავიწყო ამ ადამიანებზე მუშაობა. მათ უნდა მივცეთ საშუალება, რომ ცხოვრებაში რაღაცას მიაღიონ", _ განაცხადა სააკაშვილმა.
