საქართველოს პრეზიდენტ მიხეილ სააკაშვილის განცხადებით, ევროკავშირი დეკემბერში საქართველოსთან მოლაპარაკებას იწყებს თავისუფალ, ღრმა ვაჭრობასთან დაკავშირებით. პრეზიდენტის ინფორმაციით, პრემიერ-მინისტრი მიდის ბრიუსელში, რომ ხელი მოაწეროს მოლაპარაკებების გახსნას.
"ეს ნიშნავს, რომ 1,5-2 წელში, პრაქტიკულად თავისუფლად შევა ყველა ჩვენი ექსპორტი ევროპის ბაზარზე. ეს არის გადამწყვეტი და სასიცოცხლო საქართველოს ეკონომიკისთვის", - განაცხადა სააკაშვილმა.
მისივე თქმით, მარტში ან აპრილში საქართველო-ევროკავშირს შორის უვიზო მიმოსვლასთან დაკავშირებით მოლაპარაკებები დაიწყება.
"თქვენ იცით, რომ ჩვენ გავამარტივეთ ვიზები. უვიზო მიმოსვლა ნიშნავს, რომ საქართველოს ყველა მოქალაქეს, საქართველოს პასპორტი ედება ჯიბეში და შეეძლება სიტყვაზე ქუთაისის ახალი აეროპორტიდან გაფრინდეს დუბლინის, მიუნხენის, ლონდონის ან სხვა მიმართულებით. შევლენ ევროპაში, ამოიღებენ საქართველოს პასპორტს, ჩაურტყამენ შტამპს და არავინ არ მოსთხოვს ვიზას. ესეც უახლოესი წლების ამბავია", - აღნიშნა საქართველოს პრეზიდენტმა ქუთაისში გამართულ მთავრობის სხდომაზე.
