25 ნოემბერს, 10:00 საათზე სასტუმრო "ჰოლიდეი ინნში" ეკონომიკისა და მდგრადი განვითარების მინისტრი ვერა ქობალია ქართული ალკოჰოლური და არაალკოჰოლური სასმელების გამოფენა-ფორუმს Trade With Georgia 2011 - Tradeshow and B2B Forum (TWG 2011)-ს გახსნის. დამსწრე საზოგადოებას ასევე მიესალმება ფორუმის საპატიო სტუმარი სინგაპურის ერთადერთი ღვინის მაგისტრი ლიზა პეროტი ბრაუნი.
ღონისძიება ტარდება საქართველოს ეროვნული საინვესტიციო სააგენტოს ექსპორტის ხელშეწყობის სამსახურის ორგანიზებით ეკონომიკისა და მდგრადი განვითარების სამინისტროს პატრონაჟით და წარმოადგენს უპრეცენდენტო მასშტაბის ფორუმს ქართული სასმელების პოპულარიზაციის კუთხით.
12:30 საათზე კი "ექსპო ჯორჯიაში" საქართველოს სოფლის მეურნეობის მინისტრი ზაზა გოროზია ოფიციალურად გახსნის Trade With Georgia 2011 გამოფენა-ფორუმს, სადაც მონაწილეობს ალკოჰოლური და არაალკოჰოლური სასმელების მწარმოებელი 60-მდე ქართული კომპანია. გამოფენა-ფორუმში მონაწილეობას მიიღებს 80 უცხოელი სტუმარი, მათ შორის თრეიდერები, ღვინის ექსპერტები და ჟურნალისტები. მხოლოდ აზიიდან საქართველოს ეწვევა 43 დელეგატი (ჩინეთი, სამხრეთ კორეა, სინგაპური, იაპონია, ტაივანი). ფორუმის ფარგლებში დაგეგმილია სასმელების დეგუსტაცია ექსპერტების მიერ და ასევე ინდივიდუალური შეხვედრები ქართული კომპანიების წარმომადგენლებსა და უცხოელ თრეიდერებს შორის.
მანამდე, 24 ნოემბერს, სტუმრებისთვის გამართულ პირველ ვახშამს უმასპინძლებს mgroup-ის რესტორანი "მეტეხის ჩრდილში", სადაც 19:30 საათზე გაიმართება ქართული სასმელების დეგუსტაცია. 25 ნოემბერს 19:30 საათზე რესტორანი "ქალაქურში" - GMC group გაიმართება გალამიღება.
26 ნოემბერს დაგეგმილია ფორუმის უცხოელი სტუმრების ტური კახეთში, სადაც ისინი ესტუმრებიან წინანდლის მუზეუმსა და ვინოთეკას, ამასთანავე მოინახულებენ ქართული ღვინის მწარმოებლის მარნებს და ადგილზე დააგემოვნებენ ღვინოს.
ღონისძიების ფარგლებში, 26 ნოემბერს "ექსპო ჯორჯიაში" გაიმართება სასმელების წინასაახალწლო გამოფენა-გაყიდვა, სადაც ქართული ალკოჰოლური და არაალკოჰოლური სასმელების მწარმოებლები წარადგენენ საკუთარ პროდუქციას. ნებისმიერ მსურველს ექნება შესაძლებლობა, სპეციალური წინასაახალწლო ფასდაკლებით შეიძინოს ფამოფენაზე წარმოდგენილი სასმელები.
საქართველოს ეროვნული საინვესტიციო სააგენტო, ექსპორტის ხელშეწყობის სამსახურის 2011 წლის პრიორიტეტის ფარგლებში ახორციელებს ქართული ალკოჰოლური სასმელების პოპულარიზაციას აზიის ბაზრებზე. განხორციელებული და დაგეგმილია ურთიერთდაკავშირებული და მიზანმიმართული ღონისძიებები. აღსანიშნავია ქართული სასმელების წარმატება ჰონგ-კონგის საერთაშორისო ღვინისა და სპირტიანი სასმელების კონკურსში, სადაც სასმელების ქართველმა მწარმოებლებმა საინვესტიციო სააგენტოს დახმარებით პირველად წარადგინეს პროდუქცია. საქართველომ მოიპოვა 2 ოქრო, 1 ვერცხლი და 13 ბრინჯაო. ოქროს მედლები ქინძმარაულის მარანის მუხაში დაძველებულმა საფერავმა და შატო მუხრანის ჭაჭამ დაიმსახურეს. ქინძმარაულის მარანს ასევე წილად ხვდა გრან-პრი.