"ტავ ჯორჯიას" ტარიფების დაწევა მოუწევს, - ამის შესახებ განცხადება საქართველოს პრეზიდენტმა მიხეილ სააკაშვილმა ქუთაისის საერთაშორისო აეროპორტის რეაბილიტაციის დაწყებისას განაცხადა. პრეზიდენტმა აღნიშნა, რომ ქუთაისის საერთაშორისო აეროპორტის გახსნის შემდეგ, დატვირთვა ძირითადად ამ აეროპორტზე გადმოვა, დაბალბიუჯეტიანი ავიაკომპანიების ხარჯზე და სწორედ ამ მიზეზით თბილისის საერთაშორისო აეროპორტის მმართველ კომპანიას ტარიფების გაიაფება მოუწევს.
"დღეს ვიწყებთ კოპიტნარის აეროპორტის მშენებლობას, რომელიც მომავალ წელს დასრულდება. ქუთაისს ნამდვილი საერთაშორისო აეროპორტი უნდა ჰქონდეს. ქუთაისის უნდა ჰქონდეს ისეთი აეროპორტი, საიდანაც ყოველთვის იფრენენ თვითმფრინავები მიუნხენში. ამ აეროპორტიდან შესრულდება რეისები ქუთაისი-მიუნხენი, ქუთაისი-ლონდონი, ქუთაისი-სტამბული, ქუთაისი-შანხაი, უახლოეს წლებში - ქუთაისი-ნიუ-იორკი. ჩვენი მთავარი მიზანია, შემოვიყვანოთ დაბალბიუჯეტიანი ავიაკომპანიები. პრობლემა რა არის თბილისის საერთაშორისო აეროპორტის? - თბილისის საერთაშორისო აეროპორტში ოპერირებს თურქული კომპანიოა "ტავი", რომელთან ერთადაც ავაშენეთ ახალი აეროპორტი, მაგრამ მისი ტარიფები არის არამოქნილი. მომსახურება მაღალია თბილისის საერთაშორისო აეროპორტში და, შესაბამისად, ბილეთის ფასიც მაღალია, ვიდრე უნდა იყოს. ამიტომ შედარებით უჭირთ შემოსვლა დაბალბიუჯეტიან კომპანიებს, თუმცა ესეც დაიწყო, როგორც კი ქუთაისის აეროპორტის რეაბილიტაციაზე დავიწყეთ საუბარი. როდესაც ქუთაისის აეროპორტი გაიხსნება და ყველა გადმოვა ქუთაისისკენ, თბილისის აეროპორტს ტარიფების დაწევა მოუწევს. ხალხმა უნდა იფრინოს იაფად", - აღნიშნა პრეზიდენტმა.
როგორც ცნობილია ქუთაისის საერთაშორისო აეროპორტის მშენებლობაზე, რამდენიმე კომპანია იმუშავებს, თუმცა ცნობილია, რომ რეაბილიტაციის პროექტი ჰოლანდიურმა კომპანია "ა სტუდიომ" განახორციელა. კოპიტნარის აეროპორტის რეაბილიტაცია 2012 წლის სექტემბრისთვის დასრულდება.