ბიზნესმენ ბიძინა ივანიშვილის განცხადებით, საქართველოს მოსახლეობისა და საერთაშორისო საზოგადოების მხარდაჭერით მიხეილ სააკაშვილი იძულებული გახდება აღუდგინოს მას მოქალაქეობა.
„მოხარული ვარ, რომ ევროსაბჭოში ჩემი მოქალაქეობის ჩამორთმევის საკითხს განიხილავენ. მე იმედი მაქვს, რომ ცივილიზებული სამყარო აქტიურად ჩაერთვება ამ საკითხში. ასევე აღსანიშნავია საქართველოს მოსახლეობის გააქტიურება, რაც გამოიხატება ხელმოწერების შეგროვებაში და სხვა სახის მხარდაჭერაში. ორი მხრიდან ვაიძულებთ, სააკაშვილს, რომ დაბრუნდეს კანონის სივრცეში და აღმიდგინოს მოქალაქეობა", - განაცხადა ივანიშვილმა.
მისი თქმით, თუ პრეზიდენტმა მას მოქალაქეობა არ დაუბრუნა, არც ეს იქნება დიდი პრობლემა იმისთვის, რომ მისი გუნდი ხელისუფლებაში მოვიდეს.
„ეს 1 ან 2 პროცენტით შეცვლის მდგომარეობას. ჩამოვაყალიბებთ პარტიას და შედეგს მაინც მივიღებთ. დეპორტაციაც არაფერს მისცემს სააკაშვილსა და მის გუნდს. ქართველი მოსახლეობა აღარ დაიბნევა. გაიმარჯვებს რეალური ოპოზიცია", - აღნიშნა ბიზნესმენმა.
მისი თქმით, მისი ადვოკატები უახლოეს დღეებში საქართველოს პრეზიდენტს მოქალაქეობის აღდგენის თაობაზე მიმართავენ.
