"ქრისტიან-დემოკრატიული მოძრაობა" საერთაშორისო დემოკრატიული კავშირის (IDU) სრული წევრი გახდა. ეს გადაწყვეტილება მსოფლიოს უდიდესმა მემარჯვენე ცენტრისტულმა გაერთიანებამ ლონდონში IDU-ს წევრი პარტიის ლიდერთა შეხვედრაზე მიიღო, რომელსაც ქდმ-ს ლიდერი გიორგი თარგამაძე და პარტიის საერთაშორისო მდივანი გიორგი რუხაძე ესწრებიან.
როგორც "ჯი-ეიჩ-ენს" "ქრისტიან-დემოკრატიული მოძრაობიდან" აცნობეს, გადაწყვეტილებას გიორგი თარგამაძე ლონდონის დეკლარაციაზე ხელი მოაწერით შეუერთდა.
დეკლარაცია 1983 წელს მარგარეტ ტეტჩერის, ჯორჯ ბუშ უფროსისა და ჰელმუდ კოლის მონაწილეობით საერთაშორისო დემოკრატიული კავშირის მთავარი დამფუძნებელი დოკუმენტი გახდა.
"ქრისტიან-დემოკრატების"თავმჯდომარემ სიტყვით მიმართა მემარჯვენე-ცენტრისტული პარტიების ლიდერებს, ისაუბრა საქართველოსა და რეგიონში მიმდინარე პოლიტიკურ მოვლენებზე, მიღწევებზე, გამოწვევებზე და დამსწრე საზოგადოებას პრობლემების გადაწყვეტის ქრისტიან დემოკრატიული ხედვა გააცნო.
"საერთაშორისო დემოკრატიული კავშირი" მსოფლიოში ყველაზე დიდ მემარჯვენე-ცენტრისტული ინტერპარტიული გაერთიანებაა. მასში 50 ქვეყნის 81 პოლიტიკური ძალაა გაერთიანებული, მათ შორის არიან ბრიტანელი კონსერვატორები, გერმანელი ქრისტიან-დემოკრატები და ამერიკელი რესპუბლიკელები. IDU-ს ლიდერთა შეხვედრა დღეს დასრულდება, რის შემდეგაც ქდმ-ს ლიდერები გერმანიის ქალაქ ლაიფციგში გაემგზავრებიან, სადაც "გერმანიის ქრისტიან-დემოკრატიული კავშირის" ყრილობას დაესწრებიან.
