"ძალიან ბევრს ვფიქრობ კახეთზე, რადგან ძალიან ბევრი რამეა კახეთში გასაკეთებელი", - განაცხადა საქართველოს პრეზიდენტმა მიხეილ სააკაშვილმა ყვარელში, ილია ჭავჭავაძის სახლ-მუზეუმში, კახეთის რეგიონის წარჩინებულ მოსწავლეებთან შეხვედრაზე.
"ერთ სულ მოსახლეზე ერთიანი ეროვნული პროდუქტით კახეთი ჯერ კიდევ ჩამორჩება საქართველოს რეგიონების უმეტესობას და მკვეთრად ჩამორჩება თბილისს. ეს განპირობებულია იმით, რომ კომუნიკაციები აქ არ გადიოდა არასდროს. სოფლის მეურნეობა, რომელიც დაგვრჩა, არის დაბალინტენსიური. ამიტომ პირადად ჩემს მისიად მივიჩნევ კახეთის ზემოთ ამოწევას. პირველ რიგში, იმიტომ, რომ აქ ცხოვრობს ძალიან მაგარი ხალხი. ეს არის ჩვენი სახელმწიფოებრივი გენეტიკური კოდი კახეთიდან და ეს არის დიდი პატრიოტების სამშობლო, რომელსაც სათავეში უდგას ყველაზე დიდი პატრიოტი ილია ჭავჭავაძე", - განაცხადა სააკაშვილმა და დასძინა: "ამიტომ მომავალი წელი, პირველ რიგში, ჩემთვის კახეთის წელია".
სააკაშვილის განცხადებით, ბევრი ფიქრობს, რომ იგი მხოლოდ ბათუმს "გადაჰყვა".
"ამბობენ, სააკაშვილი გადაჰყვა ბათუმსო და ეს ასე იყო. სულ დავდიოდი, რადგან წკიპზე ვიყავი, რომ აჭარა არ დაეკარგა საქართველოს. იმიტომ, რომ ცხვირწინ ავწაპნეთ რუსეთს 2004 წელს. ჩვენ რომ გვქონოდა ასლან აბაშიძის პერიოდი, ეჭვგარეშეა, რუსეთი გამოაცხადებდა დამოუკიდებელ სახელმწიფოდ. ქუთაისელები ამბობდნენ, რომ გადაგვიფრენს და გამოგვიფრენს ხოლმეო. შემდეგ კი ასეთი სამუშაო კახეთშიც დავიწყეთ, ძალიან მაგრად ვაკეთებთ ქუთაისს და ის იქნება მნიშვნელოვანი რეგიონი საქართველოსთვის. ბევრ ახალს ვაკეთებთ გურიაში, პირველ რიგში ბახმაროში. მნიშვნელოვანი ცვლილებებია სამეგრელოში, ქართლში. თბილისში როგორც წავიდა განვითარების ტემპი, არ ყოფილა ისტორიის არც ერთ მონაკვეთზე. მაგრამ ჩემთვის მომავალი წელი კახეთის წელია. გვაქვს დიდი აღმშენებლობის წელიწადი თელავში, დუშეთში, ხევსურეთში", - განაცხადა სააკაშვილმა და დასძინა, რომ დღეს ქართული ღვინის ხარისხი არის იმ დონის, რომ შეგვიძია ვიამაყოთ ამით.
