10-12 ნოემბერს საქართველოში ვიზიტს საერთაშორისო უსაფრთხოების საკითხებში ამერიკის შეერთებული შტატების თავდაცვის მდივნის თანაშემწე ალექსანდრ ვერშბოუ განახორციელებს.
ამის შესახებ დღეს გამართულ ტრადიციულ ბრიფინგზე საქართველოს საგარეო საქმეთა მინისტრის მოადგილე ნინო კალანდაძემ განაცხადა. მისი თქმით, ვერშბოუ მონაწილეობას მიიღებს თავდაცვის სფეროში ამერიკის შეერთებული შტატებისა და საქართველოს ორმხირივ ყოველწლიურ კონსულტაციებში.
"სისტემატიურ ხასიათს ატარებს ეს კონსულტაციები და ამავდროულად ხაზს უსვამს, რომ საქართველოსა ამერიკის შეერთებულ შტატებს შორის სტრატეგიული პარტნიორობა გრძელდება, მათ შორის თავდაცვის სფეროშიც და შესაძლებელი იქნება უმაღლესი დონის შეხვედრებისას დაისვას ყველა ის საკითხი, რომელიც თავდაცვის სფეროში ამ ორ ქვეყანას შორის არის მნიშვნელოვანი", - აღნიშნა კალანდაძემ.