დღეს საქართველოს საგარეო საქმეთა მინისტრი გრიგოლ ვაშაძე სამუშაო ვიზიტით სომხეთს ეწვევა. ამის შესახებ დღეს გამართულ ბრიფინგზე საქართველოს საგარეო საქმეთა მინისტრის მოადგილემ ნინო კალანდაძემ განაცხადა. მისი თქმით, მას აქვს დაგეგმილი შეხვედრა თავის კოლეგასთან და სომხეთის პრეზიდენტთან, სადაც გათვალისწინებულია ასევე ორ ქვეყანას შორის თანამშრომლობის მთელი რიგი საკითხები.
კალანდაძემ მორიგი კომენტარი გააკეთა სომხურ მედიაში არსებულ ინფორმაციაზე, რომლის თანახმად, სომხეთის პრეზიდენტი სერჟ სარგსიანი ქართველ კოლეგაზე განაწყენებულია, რის გამოც საქართველოში ვიზიტი გადადო. მინისტრის მოადგილის თქმით, ქართულ და სომხურ მხარეებს შორის უთანხმოება არ არის და ამას გრიგოლ ვაშაძის ვიზიტიც ადასტურებს.
"ჩვენ გასულ კვირასაც ვისაუბრეთ ამის თაობაზე. მე არ ვფლობ დამატებით ინფორმაციას იმის თაობაზე, რომ სომხეთის პრეზიდენტი რაიმე ფორმით განაწყენებული იყოს მის კოლეგაზე. პირიქით, მინდა ხაზი გავუსვა იმას, რომ მათ აქვთ ძალიან კარგი ურთიერთობა. ეჭვი არ მეპარება იმაში, რომ სომხეთის პრეზიდენტის ვიზიტი განხორციელდება სწორედ იმ დროს, როდესაც, მხარეები შეთანხმდებიან ერთმანეთში. გრიგოლ ვაშაძის ვიზიტი მიუთითებს იმას, რომ მხარეებს შორის უთანხმოება არ არის",- განაცხადა კალანდაძემ.
