საქართველოს საგარეო საქმეთა მინისტრის მოადგილის ნინო კალანდაძის განცხადებით, საქართველო-რუსეთის საზღვარზე ტვირთბრუნვას მონიტორინგს შვეიცარიელი შუამავლების მიერ შერჩეული კომპანიები განახორციელებენ.
"მნიშვნელოვანია, რომ ერთის მხრივ ეს შეთანხმება შედგა და ფორმალურ დასასრულსაც უახლოვდება . ამავდროულად ყველაზე მეტად ხაზგასასმელი ქართული მხარისთვის არის ის, რომ გასული წლების განმავლობაში სრულიად უკონტროლოდ არსებული ტვირთბრუნვა ერთხელ და სამუდამოდ იურიდიულ ჩარჩოებში მოექცევა. ეს მოხდება არა მხოლოდ ფორმალურად, არამედ იმის გათვალისწინებით, რომ საერთაშორისო ზედამხედველობა განხორციელდება. მონიტორინგს შვეიცარიელების მიერ შერჩეული კომპანიები განახორციელებენ, რომლებიც იქნებიან უახლესი ტექნიკით აღჭურვილნი და ამავდროულად ინფორმაციის გაცვლის ეფექტური მექანიზმი გააჩნიათ. ამასთან, დამატებით იარსებებს საერთაშორისო დავების განხილვის მექანიზმი, რაც ჩვენთვის არის უაღრესად მნიშვნელოვანი", - განაცხადა კალანდაძემ დღეს გამართულ ბრიფინგზე.
მისი თქმით, საქართველო-რუსეთს შორის მიღწეული შეთანხმების ტექსტი არის უკვე პარაფირებული და 10 ნოემბრისთვის უნდა მოეწეროს ხელი.
"მათ შორის იმ ხელშეკრულების ტექსტიც იმ დროისთვის დაზუსტდება, რომელიც ითვალისწინებს რუსეთსა და საქართველოს მიერ ამ კომპანიებთან ასე ვთქვათ მათი მოქმედების არეალის განსაზღვრას", - განაცხადა კალანდაძემ.
მისი თქმით, რუსეთის სავაჭრო ორგანიზაციაში გაწევრიანებასთან დაკავშირებულ მოლაპარაკებების პროცესში ქართული მხარე მაქსიმალურად ცდილობდა, რომ საკითხი არ ყოფილიყო პოლიტიზირებული და მაქსიმალურად ტექნიკური და იურიდიული ყოფილიყო ეს მოლაპარაკება.
"განსაზღვრა, როგორც ასეთი საზღვრების არ მოხდება, მაგრამ გეოგრაფიული ნიშნულები, რომელიც განთავსდება და არის ხელშეკრულებით გათვალისწინებული, არის საქართველო-რუსეთის საზღვარი. აქ არის საუბარი სამივე კვეთის ადგილზე. მათ შორის, ზემო ლარსიც, რომლითაც ჩვენ ვთვლით რომ ეს დამატებითი მიღწევაა", - აღნიშნა მინისტრის მოადგილემ.
აღსანიშნავია ისიც, რომ 4 ნოემბერს გამართულ მთავრობის სხდომაზე საქართველოს პრემიერ-მინისტრმა ნიკა გილაურმა განაცხადა, რომ საზღვარზე ტვირთბრუნვას კონტროლს გაუწევენ არა კერძო კომპანიები, არამედ შვეიცარიელი შუამავლები.