„ქრისტიან-დემოკრატიული მოძრაობის" ლიდერები აჭარაში, გონიოს ციხეში მოსახლეობას შეხვდნენ. გიორგი თარგამაძემ, ლევან ვეფხვაძემ და გიორგი ახვლედიანმა ადგილობრივ მცხოვრებლებს საკანონმდებლო ინიციატივა გააცნეს. გიორგი თარგამაძის განცხადებით ხე-ტყის მოხმარების შესახებ კანონში არსებული ხარვეზის გამო, რაც ტყიდან შეშის გამოტანაზე ნებართვის დაგვიანებით გაცემაში მდგომარეობს, სოფლის მოსახლეობა, არა მარტო აჭარაში არამედ საქართველოს თითქმის ყველა რაიონში, იძულებული იყო კანონი დაერღვია და სასოფლო-სამეურნეო სამუშაოების საწარმოებლად ზამთრის შედეგად დაზიანებული ხეები პირადი მოხმარებისთვის გამოეყენებინა.
თარგამაძის თქმით, შედეგად მოსახლეობამ სახელმწიფოს მხრიდან საკმაოდ დიდი ოდენობის ჯარიმები და საურავები მიიღო.
„ჩვენ ქრისტიან-დემოკრატები მოვითხოვთ მოხდეს ამ ადამიანებისთვის აღნიშნული ჯარიმების ერთჯერადად ჩამოწერა. ჩვენს მიერ შემუშავებული კანონპროექტიც, რომელსაც საქართველოს პარლამენტს ორშაბათს წარვუდგენთ, სწორედ ამ მოთხოვნის დაკმაყოფილებას ითვალისწინებს" - განაცხადა გიორგი თარგამაძემ.
შეხვედრაზე ქდმ-ს ლიდერებმა ასევე ჰიბრიდული სიმინდის მოუსავლიან წელზე და ციტრუსის რეალიზებასთან დაკავშირებულ პრობლემებზე ისაუბრეს.
