სახალხო კრების წარმომადგენელთა განცხადებით, ხელისულება მათი აქტივისტების მიმართ ტერორს აგრძელებს. "სახალხო კრების" განცხადების თანახმად, 24 ოქტომბერს სასამართლომ სახალხო კრების ერთ-ერთ აქტივისტს, ზურაბ ხუციშვილს, ნარკოტიკების შეძენა-შენახვის ბრალდებით, 8 წლით თავისუფლების აღკვეთა მიუსაჯა.
"დღეის მდგომარეობით სხვადასხვა ბრალდებით სახალხო კრების 40-მდე მხარდამჭერია დაპატიმრებული, საიდანაც 22-ს სასამართლომ თავისუფლების აღმკვეთი ღონისძიებები უკვე შეუფარდა, ხოლო დანარჩენები განაჩენის მოლოდინში არიან. მათზე ხორციელდებოდა და ხორციელდება უპრეცედენტო ზეწოლა, რათა ხელისუფლებამ მათთვის სასურველი აღიარებით ჩვენება მიიღოს. მიუხედავად იმისა, რომ ხელისუფლება მისთვის აპრობირებული ტერორისტული მეთოდებით ებრძვის სახალხო კრებას, რაც მის მხარდამჭერთა მასობრივ დაპატიმრებებში და კრების ქონების ჩამორთმევაში გამოიხატება, კრება აუცილებლად განახორციელებს მის მიერ გამოცხადებული პრინციპების რეალიზაციას და ქვეყანაში აუცილებლად განხორციელდება დემოკრატიული ცვლილებები", - აღნიშნულია "სახალხო კრების" განცხადებაში.
განცხადების თანახმად, "სახალხო კრება" მოუწოდებს საქართველოში აკრედირებულ დიპლომატიურ კორპუსს და ადამიანის უფლებადამცველ ორგანიზაციებს, მოახდინონ რეაგირება კრების მხარდამჭერთა მიმართ ხელისუფლების მიერ განხორციელებული ტერორის ფაქტებზე.
