ხვალ, 13 ოქტომბერს, "ეროვნულ-დემოკრატიული პარტიის" ოფისში პარტიის ქალთა ორგანიზაციის პრეზენტაცია გაიმართება. ედპ-ს ქალთა ორგანიზაციის დაფუძნებას დაესწრებიან პარტიის ლიდერები, ამერიკის საერთაშორისო რესპუბლიკური ინსტიტუტისა და ამერიკის ეროვნულ-დემოკრატიული ინსტიტუტის წარმომადგენლები.
"ედპ-ში ქალთა ორგანიზაციის ჩამოყალიბების პროცესი დიდი ხნის დაწყებული გვაქვს. ჩვენთვის ამოსავალია, ერთი მხრივ, ქალთა აქტიური ჩართვა მმართველობასა და გადაწყვეტილების მიღების პროცესებში და, მეორე მხრივ, საერთო პოლიტიკური პასუხისმგებლობის განაწილება, რასაც მოითხოვს "ეროვნულ-დემოკრატიული პარტიის" პოლიტიკური დღეები. ვითვალისწინებთ იმასაც, რომ ახლოვდება წინასაარჩევნო ეტაპები და "ეროვნულ-დემოკრატიული პარტიის" ქალთა ორგანიზაცია სრულ მზადყოფნაშია, რათა თითქმის ყველა ოჯახში მივიდეს ედპ-ის პოლიტიკური პოზიცია", - განაცხადა ედპ-ის ქალთა ორგანიზაციის თავმჯდომარემ, ეკა შინდაგორიძემ.
