"ქართული პარტიის" თავჯდომარის სოზარ სუბარის განცხადებით, ის მზადაა, ბიძინა ივანიშვილთან ქართული პარტიის სახელით ითანამშრომლოს.
"მზადა ვარ, ბიძინა ივანიშვილთან ქართული პარტიის სახელით ვითანამშრომლო", - აცხადებს იგი.
შეგახსენებთ, რომ ივანიშვილმა სუბართან თანამშრომლობა მოინდომა.
"ხელისუფლების დაკვეთას ასრულებენ ზემოთ ნახსენები პარტიების ლიდერები - შალვა ნათელაშვილი, დავით გამყრელიძე, ეროსი კიწმარიშვილი, ბაჩუკი ქარდავა. დიახ, მე ვერ ვითანამშრომლებ ამ ადამიანებთან, თუმცა არ გამოვრიცხავ, რომ ამ ფსევდოოპოზიციური პარტიების ზოგიერთ წევრთან ურთიერთობაზე დავთანხმდე, თუ ისინი თავიანთი პოლიტიკური წარსულის რევიზიას შეძლებენ. არ შემიძლია ორიოდე სიტყვა არ ვთქვა სოზარ სუბარზე, ადამიანზე, რომელსაც ომბუდსმენის საპასუხისმგებლო პოსტზე ბევრი კარგი საქმე აქვს გაკეთებული და რომელსაც არაერთხელ დაუფიქსირებია მტკიცე პოზიცია ხელისუფლების თავნებობის წინააღმდეგ. დიდი გულისტკივილით და სინანულით ვამბობ, რომ სუბარი აღმოჩნდა იქ, სადაც მისი ადგილი არ იყო. თუ ბატონ სოზარს სურვილი ექნება, ჩვენს პოლიტიკურ ორგანიზაციას შემოუერთდეს, ამას მხოლოდ მივესალმები.
ვიმეორებ: თანამშრომლობაზე უარს ვაცხადებ ზემოთ დასახელებულ ოპოზიციურ პარტიებთან და არა ამ პარტიების ცალკეულ კეთილსინდისიერ წევრებთან", - აღნიშნულია ივანიშვილის დღევანდელ განცხადებაში.