"მოძრაობა სამართლიანი საქართველოსთვის" ხელისუფლებას თავისუფალ მედიაზე ზეწოლაში ადანაშაულებს. როგორც პარტიის ოზურგეთის რაიონული ორგანიზაციის ხელმძღვანელმა ლელა ნაცვალაძემ დღეს გამართულ პრესკონფერენციაზე განაცხადა, "ოზურგეთის ხელმძღვანელობა რაიონში გამომავალ გაზეთ "ალიონზე" ზეწოლას სხვადასხვა ფორმით ახდენს.
"ეს, პირველ ყოვლისა, ფინანსური ბერკეტების გამოყენებაში გამოიხატება. გაზეთი ძალიან დააზარალა იმან, რომ მუნიციპალიტეტმა არ გადაიხადა მისი შეკვეთის საფუძველზე გამოქვეყნებულიNსხვადასხვა მასალის (განცხადებები, ბრძანებულებები, განკარგულებები და ა.შ) საფასური. გარდა ამისა, რეკლამის დამკვეთებს, ადგილობრივი ხელისუფლების მხრიდან, არაოფიციალურად მიღებული აქვთ მითითება, რომ გაზეთ "ალიონში" არანაირი რეკლამა არ მიიტანონ", - განაცხადა ნაცვალაძემ.
მისი განმარტებით, სერიოზულად იზღუდება გაზეთის გავრცელებაც. კერძოდ, საბიუჯეტო დაწესებულებებს აეკრძალათ "ალიონის" გამოწერა, რამაც გაზეთი ფინანსურად ძალიან დააზრალა და დახურვის პირამდე მიიყვანა.
"მოძრაობა სამართლიანი საქართველოსთვის" წარმომადგენელი აცხადებს, რომ გახშირდა ჟურნალისტების დაშინების მცდელობებიც, რაც მათ მიმართ მუქარის შემცველ სატელეფონო ზარებში გამოიხატება.
"ალიონის" მიმართ ასეთ დამოკიდებულეაბს ლელა ნაცვალაძე იმით ხსნის, რომ გაზეთში ქვეყნდება ობიექტური პუბლიკაციები ოზურგეთის რაიონში არსებული მდგომარეობის შესახებ. მისი თქმით, ოზურგეთის რაიონულ გაზეთზე ზემოქმედების მთავარ "წყაროს" გურიაში სახელმწიფო რწმუნებულის მოადგილე ლელა თავართქილაძე წარმოადგენს, რომლის დანიშვნა ამ თანამდებობაზე ექს-გუბერნატორ რამაზ ნიკოლაიშვილის "ხელდასმით" მოხდა.
