"ქრისტიან-დემოკრატების" ლიდერი მანჩესტერში გაერთიანებული სამეფოს საგარეო საქმეთა მინისტრს უილიამ ჰეიგს შეხვდა. საუბარი შეეხო საქართველოსა და კავკასიის რეგიონში მიმდინარე მოვლენებს. ბრიტანეთის საგარეო საქმეთა მინისტრმა კიდევ ერთხელ დააფიქსირა გაერთიანებული სამეფოს მხარდაჭერა საქართველოს სუვერენიტეტისა, ტერიტორიული მთლიანობისადმი და დემოკრატიული ინსტიტუტების გაძლიერების აუცილებლობაზე ისაუბრა.
გიორგი თარგამაძემ ბრიტანეთის კონსერვატიულ მთავრობას მადლობა გადაუხადა რუსეთთან მიმართებაში პრინციპული პოზიციისთვის. "ევროკავშირის ქვეყნებმა ნათლად უნდა დააფიქსირონ პოზიცია, რომ არ დაუშვებენ საქართველოს საზღვრების ძალის გამოყენებით შეცვლას. რაც უფრო მალე გათავისუფლდება რუსეთი ამ ილუზიისგან, მით უფრო მალე გაჩნდება სივრცე დიალოგისთვის" - განაცხადა "ქრისტიან-დემოკრატების" ლიდერმა
უილიამ ჰეიგის გარდა გიორგი თარგამაძე დღეს ბრიტანეთის ევროპის საქმეთა მინისტრს დევიდ ლიდინგტონსა და ევროპარლამენტში კონსერვატორების ლიდერს მარტინ კალანანს შეხვდა.
გიორგი თარგამაძე და პარტიის საერთაშორისო მდივანი გიორგი რუხაძე მანჩესტერში ბრიტანეთის კონსერვატიული პარტიის მიწვევით იმყოფებიან. ხვალ საპარლამენტო უმცირესობის ლიდერი ლონდონში საერთაშორისო ურთიერთობების სამეფო უნივერსიტეტის საექსპერტო ცენტრ "ჩეთემ ჰაუზში" სიტყვით გამოვა.
მასალის გამოყენების პირობები
