25 სექტემბერს, 18:00 საათზე, კასპის რაიონში სოფელ ახალქალაქში თანამედროვე ხელოვნების საერთაშორისო ფესტივალი - "Fest i nova 2011" - გაიხსნება. ძმები ზდანევჩების სახელობის თანამედროვე ხელოვნების მესამე საერთაშორისო ფესტივალი 30 სექტემბრის ჩათვლით არტ-ვილა "გარიყულაში" მოეწყობა.
წლევანდელ ფესტივალში მონაწილეობენ ხელოვანები შემდეგი ქვეყნებიდან: საქართველი, საფრანგეთი, აშშ, ლიტვა, რუსეთი, დიდი ბრიტანეთი, პოლონეთი. მონაწილეები წარმოადგენენ როგორც ინდივიდუალურ, ისე ჯგუფურ ნამუშევრებს, მათ შორის საერთაშორისო პროექტებს. ფესტივალზე წარმოდგენილი იქნება დოკუმენტური კინო, ფერწერა, გრაფიკა, ქანდაკება, არტ ობიექტი, პერფორმანსი, პოეზია, და ა.შ.
როგორც ფესტივალის ორგანიზატორები აცხადებენ, ღონისძიების მიზანია, ხელი შეუწყოს ქართველ და უცხოელ ხელოვანთა შორის გამოცდილების გაზიარებას, ქვეყნის კულტურული კავშირების გაფართოებას და ახალგაზრდა ნიჭიერი ხელოვანების წარმოჩენას.
წლევანდელი ფესტივალის მთავარი იდეაა "DA რაა.. რო...". ამ ტერმინს ხშირად გამოიყენებენ აღმოსავლეთ საქართველოში, რაც ერთგვარი აბსტრაქტული ცნებაცაა და ასოცირდება ოპტიმიზმთან, იუმორთან, შეუძლებლის განხორციელებასთან, წარმოუდგენელი ოცნების შესრულებასთან.
არტ-ვილა "გარიყულა" თანამედროვე ხელოვნების პირველი რეგიონალური ცენტრია საქართველოში, რომელიც განთავსებულია მე-19 საუკუნის კულტურული მემკვიდრეობის ძეეგლში, ე. წ. ბოლგარსკების სასახლეში და მდებარეობს კასპის რაიონის სოფელ გარიყულაში.
