"თავისუფალი დემოკრატების" წევრი, ოპოზიციონერი დეპუტატი გიორგი ცაგარეიშვილი ე.წ. ოტსტუპნიკების პრობლემის მოგვარებასთან დაკავშირებით თავის მიერ შეტანილი კანონპროექტის განხილვას ითხოვს.
როგორც იურიდიულ საკითხთა კომიტეტის სხდომაზე ცაგარეიშვილმა აღნიშნა, გრაფიკის თანახმად, პროექტი იურიდიულ საკითხთა კომიტეტს დღეს უნდა განეხილა, თუმცა როგორც გაირკვა, ადამიანის უფლებათა დაცვის საპარლამენტო კომიტეტს ჯერ მასზე სავალდებულო დასკვნა არ წარუდგენია.
"პრობლემა მწვავედ დგას, ამიტომ ვითხოვთ კანონპროექტის განხილვის დაწყებას. ვფიქრობ, ამ საკითხზე შეთანხმება შესაძლებელია. "თავისუფალ დემოკრატებს" არ გვსურს საკითხის პოლიტიზება, რადგან ამ პრობლემის გადაჭრას ათიათასობით მოქალაქე ელოდება. თუმცა თუ ის გაღიზიანებთ, რომ კანონპროექტი ჩემი ინიცირებულია, შემიძლია უკან გვიწვიო, თუ საკითხის განხილვა ისე მოხდება", - აღნიშნა ცაგარეიშვილმა.
"თავისუფალი დემოკრატების" საკანონმდებლო წინადადება ვადის გადაწევას 2015 წლამდე და სახელმწიფო კომისიის შექმნას ითვალისწინებს.
მოქმედი კანონმდებლობით, ე.წ. ოტსტუპნიკებმა ბინების მესაკუთრეებთან შეუთანხმებლობის შემთხვევაში წლის ბოლოს ბინები უნდა დაცალონ.
კანონის თანახმად, მესაკუთრეს შეუძლია "ოტსტუპნიკს" გადაუხადოს საცხოვრებლის საბაზრო ღირებულების 90% ან 75% და დაეუფლოს თავის საკუთრებას, ხოლო თუ მესაკუთრე უარს აცხადებს კომპენსაციის გადახდაზე, "ოტსტუპნიკს" შეუძლია გადაუხადოს მესაკუთრეს საბაზრო ღირებულების 10% ან 25% და მიიღოს ქონება საკუთრებაში. ამავე კანონის თანახმად, თუ "ოტსტუპნიკი" ამ უფლებას არ განახორციელებს 2012 წლის პირველ იანვრამდე, მესაკუთრეს უფლება ეძლევა, უპირობოდ მოსთხოვოს მას საცხოვრებლის დატოვება.