საქართველოს საგარეო საქმეთა მინისტრი მხარდაჭერისთვის ჩეხეთის მთავრობას მადლობას უხდის
„მინდა მადლობა გადავუხადო ჩეხეთის მთავრობას, თავად საგარეო საქმეთა მინისტრ, ბატონ კარლ შვანცერბერგს და ჩეხ ხალხს იმ მხარდაჭერისთვის, რომელსაც საქართველო ყოველთვის იღებდა და იღებს, როგორც ჩვენი ქვეყნის დამოუკიდებლობას, სუვენეტეტსა და ტერიტორიულ მთლიანობასთან, ისე ევროკავშირსა და ნატოში ინტეგრაციასთან დაკავშირებით", - განაცხადა გრიგოლ ვაშაძემ თბილისში ვიზიტით მყოფ ჩეხეთის საგარეო უწყების ხელმძღვანელთან შეხვედრის შემდეგ გამართულ ერთობლივ პრესკონფერენციაზე.
რაც შეეხება უშუალოდ შეხვედრას, საქართველოს მთავარი დიპლომატის განმარტებით, მასზე საუბარი საქართველოს ოკუპირებულ ტერიტორიებზე არსებულ ვითარებას და საქართველოს საგარეო და საშინაო მდგომარეობას შეეხო.
„შევეცადეთ კარლ შვანცერბერგისთვის მაქსიმალურად ზუსტი ინფორმაცია მიგვეწოდებინა როგორც ოკუპირებულ ტერიტორიებზე არსებულ ვითარებასთან დაკავშირებით, ისე იმის შესახებ, თუ სად იმყოფება საქართველო საგარეო და საშინაო პოლიტიკის თვალსაზრისით", - აღნიშნა ვაშაძემ.
შეგახსენებთ, რომ ჩეხეთის საგარეო საქმეთა მინისტრის ხელმძღვანელობით ქვეყნის დელეგაცია საქართველოში გუშინ ჩამოვიდა. კარლ შვანცერბერგის ვიზიტის პროგრამა საკმაოდ დატვირთულია. ის უკვე მთავრობის თითქმის ყველა წევრს შეხვდა. ჩეხ დიპლომატს დღესვე საქართველოს პრეზიდენტი მიხეილ სააკაშვილი მიიღებს.
