აფხაზეთის ლეგიტიმური მთავრობის თავმჯდომარე გიორგი ბარამია რუსეთის სათათბიროს გადაწყვეტილებას აფხაზეთში 12 დეკემბრის არჩევნებისთვის დეპუტატების გაგზავნასთან დაკავშირებით რუსეთის მორიგ უკანონო ნაბიჯს უწოდებს.
როგორც მთავრობის სხდომის დაწყების წინ ბარამიამ ჟურნალისტებს განუცხადა, რუსეთი ამით ცდილობს, ლეგიტიმაცია გაუკეთოს აფხაზეთის დამოუკიდებლობას. ბარამია იმედს გამოთქვამს, რომ საერთაშორისო საზოგადოება შესაბამის რეაგირებას მოახდენს რუსეთის უკანონო ქმედებებზე და რუსეთი საერთაშორისო იზოლაციაში აღმოჩნდება.
"სახელმწიფო სათათბირო აპირებს დეპუტატების გაგზავნას აფხაზეთში 12 დეკემბრის არჩევნებზე დამკვირვებლად. ეს არის მორიგი უკანონო ნაბიჯი რუსეთის ფედერაციის მხრიდან და რუსეთი ამით კიდევ ერთხელ უსვამს ხაზს თავის უკანონო ქმედებებს. რუსეთი ამით ცდილობს, ლეგიტიმაცია გაუკეთოს აფხაზეთის დამოუკიდებლობას. იმედია, საერთაშორისო თანამეგობრობა ამაზე მკაცრ რეაგირებას მოხადენს და რუსეთი ახლო მომავალში არასახარბიელო მდგომარეობაში აღმოჩნდება. რუსეთის ეს ქმედება საერთაშორისო სამართლის პრინციპსაა მოკლებული", - განაცხადა ბარამიამ.
მთავრობის სხდომა სახელმწიფო კანცელარიაში რამდენიმე წუთის წინ დაიწყო. მთავრობის წევრები 88 საკითხს განიხილავენ.
